सप्तरी–२ चुनाव : शरद सिंह यादवले सार्वजनिक गरे विकासका एजेन्डा

राजविराज । जन अधिकार पार्टीका राष्ट्रिय अध्यक्ष शरद सिंह यादवले सप्तरी निर्वाचन क्षेत्र नम्बर–२ बाट प्रतिनिधिसभा सदस्यका लागि उम्मेदवारी दिएका छन् । नेपाल पत्रकार महासंघ सप्तरीको सभाहलमा मंगलवार आयोजित पत्रकार सम्मेलनमार्फत उनले आफ्नो विकाससम्बन्धी प्रतिबद्धता सार्वजनिक गरेका हुन् ।

जारी गरिएको प्रतिबद्धता–पत्रमा यादवले क्षेत्रको समग्र विकासलाई आफ्नो प्रमुख प्राथमिकता बनाउने बताएका छन् । उनले राजविराज तथा आसपासका क्षेत्रको ऐतिहासिक, राजनीतिक र सामाजिक महत्व उल्लेख गर्दै राजविराज नेपालकै पहिलो योजनाबद्ध सहर भएको दाबी गरेका छन् ।

यादवले शिक्षा, स्वास्थ्य, रोजगारी, पर्यटन र पूर्वाधार विकासमा विशेष ध्यान दिने प्रतिबद्धता व्यक्त गरेका छन् । उनका प्रमुख एजेन्डामा सरकारी अस्पतालको स्तरोन्नति तथा स्वास्थ्य सेवामा सुधार, धार्मिक तथा पर्यटकीय स्थलहरूको विकास, सीमा क्षेत्रको व्यवस्थित व्यवस्थापन, कृषि तथा सिँचाइ सुधार, गुणस्तरीय शिक्षा, पुस्तकालय स्थापना तथा युवाका लागि रोजगारी सिर्जना रहेका छन् ।

विगतदेखि नै जनताको हक–अधिकारका लागि निरन्तर आवाज उठाउँदै आएको उल्लेख गर्दै यादवले जनताको समर्थन प्राप्त भएमा क्षेत्रको समग्र विकासका लागि जिम्मेवारीपूर्वक काम गर्ने बताएका छन् । उनले  निर्वाचनमा आफुलाई मतदान गरी विजयी गराउन मतदातासमक्ष अपिलसमेत गरेका छन् ।