मधेश ६० प्रतिशत जनसङ्ख्या, बजेट मात्र ११ प्रतिशत : उपेन्द्र यादव

राजविराज । जनता समाजवादी पार्टी (जसपा) नेपालका अध्यक्ष उपेन्द्र यादवले जनसङ्ख्याको आधारमा निर्वाचन क्षेत्र निर्धारण तथा विकासीय बजेट विनियोजन नहुनु मधेशी जनताप्रतिको गम्भीर बेइमानी भएको बताएका छन् ।

सप्तरीको रुपनी गाउँपालिका–२, पिपराहीमा बुधबार आयोजित चुनावी छलफल तथा भेटघाट कार्यक्रममा सम्बोधन गर्दै अध्यक्ष यादवले बाँकी अधिकार सुनिश्चित गर्न अझै संघर्ष आवश्यक रहेको बताए । सप्तरी निर्वाचन क्षेत्र नम्बर–३ बाट प्रतिनिधिसभा सदस्यका उम्मेदवारसमेत रहेका उनले पहाडी जिल्लामा ८–१० हजार जनसङ्ख्यामा एक जना प्रतिनिधिसभा सदस्य हुने अवस्था रहेको तर मधेशमा डेढ लाख जनसङ्ख्यामा पनि एक जना मात्र प्रतिनिधि हुने असमानता कायमै रहेको उल्लेख गरे ।

उनले मधेशको जनसङ्ख्या करिब ६० प्रतिशत भए पनि विकासीय बजेट केवल ११ प्रतिशत मात्र विनियोजन हुने गरेको बताए । साथै देशको कुल राजस्वमध्ये करिब ७० प्रतिशत मधेशबाट उठ्ने गरेको उल्लेख गर्दै यस अवस्थालाई मधेशी जनताप्रतिको अन्याय र बेइमानीको संज्ञा दिए ।

अध्यक्ष यादवले मधेश जनविद्रोहकै कारण महिला, दलित, थारु, आदिवासी जनजाति, मुस्लिम, अल्पसङ्ख्यक तथा पछाडि पारिएका समुदायको सरकारी सेवा र राजनीतिक क्षेत्रमा प्रतिनिधित्व सुनिश्चित भएको स्मरण गराए । तत्कालीन मधेशी जनअधिकार फोरमसँग भएको सम्झौतापछि पहिलो चरणमा २२ लाख र दोस्रो चरणमा ९ लाख गरी ३१ लाख नागरिकताविहीन नागरिकले नागरिकता पाएको जानकारी पनि उनले दिए ।

संघीयता उत्कृष्ट शासन प्रणाली भए पनि अधिकार नदिएर कमजोर बनाइँदा संघीयतामाथि गलत भाष्य निर्माण गरिएको उनको भनाइ थियो । २००७, २०१७ र २०४६ सालका राजनीतिक परिवर्तनमा मधेशी जनताले ठूलो बलिदान दिए पनि त्यसपछि बनेका सरकारहरूले मधेशीलाई शासित र शोषित मात्र बनाएको उनले आरोप लगाए ।

संविधान संशोधन तथा पुनर्लेखनमार्फत आफ्ना अधिकार सुनिश्चित गर्न जसपा नेपाल मजबुत रूपमा प्रतिनिधिसभामा पुग्नुपर्ने आवश्यकता औंल्याउँदै अध्यक्ष यादवले शोषित–उत्पीडित समुदायका हक–अधिकारका लागि आफैंले संघर्ष गर्नुपर्नेमा जोड दिए ।

यसैबीच, बुधबार नै रुपनी गाउँपालिका–४ का छपकी, भथौल र लक्ष्मीपुरमा पनि भेटघाट तथा छलफल कार्यक्रम सम्पन्न भएको छ । कार्यक्रममा पार्टीका केन्द्रीय सचिव शैलेन्द्र प्रसाद साह, नेता मुनीलाल खंग, दिलकुमारी चौधरी, जिल्ला अध्यक्ष सुनिल कुमार झा, उपाध्यक्ष हरेराम यादव, सचिव जयनारायण यादवलगायत नेताहरूले मन्तव्य व्यक्त गरेका थिए ।