चन्दन यादब 
राजबिराज । जनता समाजवादी पार्टी नेपालका नेता, पूर्वमन्त्री तथा सप्तरी क्षेत्र नम्बर २ बाट प्रतिनिधिसभा सदस्यका उम्मेदवार उमेश कुमार यादव ले मतदातालाई झुटा आश्वासन र भ्रामक प्रचारमा नपर्न आग्रह गरेका छन् ।
राजबिराज नगरपालिका वडा नम्बर २ मा आयोजित जनतासँग भेंटघाट तथा छलफल कार्यक्रममा बोल्दै उनले अधिकार, विकास र जनहितका लागि निरन्तर संघर्ष गर्ने उम्मेदवारलाई रोज्नुपर्ने बताए । वर्तमान चुनावी माहोलमा केही समूहले भ्रामक प्रचारमार्फत जनतालाई दिग्भ्रमित गर्ने प्रयास गरिरहेको उल्लेख गर्दै यस्ता गतिविधिप्रति सचेत रहन उनले आग्रह गरे ।
उनले भने, “भ्रामक प्रचार गर्नेहरूलाई जनताले चिन्नु जरुरी छ । हामी सामाजिक सञ्जालको भरमा होइन, जनसंघर्षबाट राजनीति गरेर यहाँसम्म आइपुगेका हौँ ।”
विगतका उपलब्धि र विकास योजनाको स्मरण
कार्यक्रमका क्रममा यादवले जनता समाजवादी पार्टी नेपाल को नेतृत्वमा अघि बढाइएका विकास योजनाहरूको चर्चा गर्दै सप्तरीको समग्र विकासलाई प्राथमिकतामा राखेर काम गर्ने प्रतिबद्धता दोहोर्याए । पार्टी अध्यक्ष उपेन्द्र यादव निर्वाचित भएका बेला जिल्लामा ठूला र दीर्घकालीन योजनाहरू सुरु गरिएको उनले बताए ।
उनका अनुसार प्रमुख विकास योजनाहरू यसप्रकार छन्–
– गजेन्द्रनारायण सिंह अस्पताल मा थप शैय्यासहित अत्याधुनिक भवन निर्माण
– कृषि विश्वविद्यालय स्थापना तथा पठनपाठन सञ्चालन
– अस्पताल परिसरमै नर्सिङ भवन निर्माण
– महेन्द्र बिन्देश्वरी बहुमुखी क्याम्पस मा इन्जिनियरिङ भवन निर्माण
– रामराजा प्रसाद सिंह स्वास्थ्य विज्ञान प्रतिष्ठान स्थापना
– राजबिराज–रुपनी चार लेन सडक विस्तार
– राजबिराज–छिन्नमस्ता–न्यौर तथा राजबिराज–हनुमाननगर–भारदह सडक स्तरोन्नति
यी योजनाहरूलाई पूर्णता दिने र नयाँ विकास आयोजनाहरू अघि बढाउने लक्ष्य रहेको उनले बताए ।
“शीर उँचो राख्ने प्रतिबद्धता”
उमेश यादवले सप्तरी शिक्षा, स्वास्थ्य, कृषि र पूर्वाधारका दृष्टिले अझै पछाडि परेको उल्लेख गर्दै अनुभवी, प्रतिबद्ध र विकासप्रेमी नेतृत्व आवश्यक रहेको बताए । जनविश्वास कहिल्यै नतोड्ने दाबी गर्दै उनले सप्तरीवासीको सम्मान, पहिचान र अधिकारका लागि निरन्तर संघर्ष गर्ने प्रतिबद्धता व्यक्त गरे ।
नेताहरूको सहभागिता
कार्यक्रममा जसपा नेपालका केन्द्रीय सचिव शैलेन्द्र प्रसाद साह, केन्द्रीय सदस्य शैलेन्द्रमोहन झा, प्रदेश समितिका पूर्व सचिव युसुफ अली, जिल्ला सचिवद्वय निरज मुक्ति र जयनारायण यादवलगायत पार्टीका विभिन्न तहका नेताहरूको उपस्थिति थियो। वडा अध्यक्ष, युवा नेता तथा क्षेत्रीय नेतृत्वले पनि कार्यक्रमलाई सम्बोधन गरेका थिए ।
घरदैलो अभियानलाई तीव्रता
उम्मेदवार यादवसहितको टोलीले बिहीबार तिलाठी कोइलाडी गाउँपालिका वडा नम्बर ७, ८ र १ अन्तर्गत बेल्ही, लौनियाँ, सडेपार र तोपा टोलमा घरदैलो अभियान सञ्चालन गर्दै मतदातासँग प्रत्यक्ष भेटघाट तथा छलफल गरेको थियो । स्थानीय विकास, रोजगारी र पूर्वाधारसम्बन्धी सुझावहरू संकलन गरिएको जनाइएको छ ।
उमेश कुमार यादवका प्रमुख चुनावी एजेन्डा
– मधेशी तथा शोषित–उत्पीडित समुदायको अधिकार संरक्षण र संस्थागत व्यवस्था
– सप्तरीमा स्वास्थ्य सेवा विस्तार र आधुनिक अस्पताल पूर्वाधार
– कृषि विश्वविद्यालय तथा प्राविधिक शिक्षाको विकास
– सडक तथा यातायात पूर्वाधार (चार लेन र ग्रामीण सडक विस्तार)
– युवा लक्षित रोजगारी र सीप विकास कार्यक्रम
– शिक्षा क्षेत्रको आधुनिकीकरण र प्राविधिक अध्ययनको प्रवर्द्धन
– दीर्घकालीन क्षेत्रीय विकास योजनामार्फत सप्तरीको समग्र रूपान्तरण
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |