एकसाता भित्र माग सम्बोधन नभए सरकार विरुद्ध आन्दोलनमा उत्रिने चेतावनी

राजविराज । एभिन्युज टेलिभिजनकर्मी पत्रकार सुरेश रजकलाई जिउँदै आगो लगाएर हत्या गर्ने हत्यारा तथा सञ्चार गृहमा आगजनी गर्नेलाई कारबाहीको माग गर्दै  सरकारलाई ध्यानाकर्षणपत्र बुझाइएको छ ।

नेपाल पत्रकार महासंघ सप्तरीद्वारा सोमबार जिल्ला प्रशासन कार्यालय सप्तरी मार्फत सरकारलाई ध्यानाकर्षणपत्र बुझाइएको हो । 

नेपाल पत्रकार महासंघ सप्तरीका अध्यक्ष श्रवण कुमार देवको नेतृत्वमा प्रमुख जिल्ला अधिकारी भोला दाहाल मार्फत प्रधानमन्त्री तथा मन्त्रिपरिषद्को कार्यालयलाई ध्यानाकर्षण पत्र बुझाइएको हो । 

ध्यानाकर्षण पत्र बुझ्दै प्रजिअ दाहालले  तत्कालै  सम्बन्धित निकायमा पठाउने प्रतिबद्धता व्यक्त गरे । ध्यानाकर्षणपत्रमा  पत्रकार रजकको हत्यारा तथा संचार गृह र पत्रकारहरूमाथि भएको दुर्व्यवहारप्रति आपत्ति जनाएको छ ।

यसैगरी पत्रकार रजकको परिवारलाई न्याय तथा संचार गृहमा भएको क्षतिपूर्ति तथा घाइते पत्रकारहरूको उपचारको प्रबन्धक मिलाउन  सरकारको ध्यानाकर्षण गराइएको छ । 

ध्यानाकर्षणपत्रमा एकसाता भित्र माग सम्बोधन गर्न आग्रह गर्दै सुनुवाइ नभए सरकार विरुद्ध देशव्यापी चरणबद्ध आन्दोलनमा उत्रिने चेतावनी दिइएको छ ।