कञ्चनरुपमा लोकसेवा तयारी कक्षा सुरु, समावेशी सहभागिता अभिवृद्धिमा जोर

सप्तरी, कञ्चनरुप । मधेसी समुदायको सशक्तीकरण र समावेशी सहभागिता अभिवृद्धि गर्ने उद्देश्यले कञ्चनरुप नगरपालिका-८ स्थित सर्वोदय माध्यमिक विद्यालय कञ्चनपुरमा लोकसेवा तयारी कक्षा सञ्चालन गरिएको छ ।

आइतबार एक विशेष समारोहका बीच कार्यक्रमको औपचारिक उद्घाटन मधेसी आयोगकी सदस्य रेणु साहको अध्यक्षतामा सम्पन्न भयो । कार्यक्रममा कञ्चनरुप नगरपालिकाका नगरप्रमुख ललन प्रसाद गुप्ता प्रमुख अतिथि र नेपाली सेनाका प्रमुख सेनानी रमेश पाण्डे विशिष्ट अतिथिका रूपमा उपस्थित थिए ।

कार्यक्रमलाई सम्बोधन गर्दै सदस्य साहले समावेशी विकास र जनचेतना अभिवृद्धिबिना मुलुकको समग्र प्रगति असम्भव हुने बताइन्। “तीन महिनासम्म सञ्चालन हुने लोकसेवा तयारी कक्षा महत्वपूर्ण छ, तर केवल यत्तिले पुग्दैन,” उनले भनिन्, “विद्यार्थीलाई प्रभावकारीरूपमा शिक्षण र मार्गदर्शन दिनु आवश्यक छ ।”

साहले सुरक्षासम्बन्धी निकायहरूमा महिलाको प्रतिनिधित्व अत्यावश्यक रहेको बताउँदै भनिन्, “पहिले प्रहरी देख्दा डर लाग्थ्यो, अब डराउनु हुँदैन। प्रहरी बन्नुपर्छ र राष्ट्रसेवामा लाग्नुपर्छ ।”

उनले मधेस आन्दोलनपछिका उपलब्धिहरू स्मरण गर्दै मधेस, मुस्लिम, थारु, दलित र महिला आयोगजस्ता संवैधानिक अंगहरूलाई पूर्णरूपमा कार्यान्वयन गर्न सकेमा मात्र समुदायको अधिकार सुनिश्चित हुने उल्लेख गरिन् ।

कार्यक्रममा प्रहरी उपरीक्षक ज्ञानमणि पौडेल, राष्ट्रिय अनुसन्धान विभागका उप–अनुसन्धान निवेदक सुरेन्द्र कोइराला, कञ्चनपुर प्रहरीका प्रमुख प्रहरी निरीक्षक माधव प्रसाद काफ्ले,  प्रमुख प्रशासकीय अधिकृत नवराज खड्का, वडा नं ८ का वडाध्यक्ष कृष्ण प्रसाद शाह,  समाजसेवी जोगिन्द्र पासवान, विद्यालयका प्रधानाध्यापक तरानन्द मलिक, स्थानीय पत्रकार, विद्यार्थी र अभिभावकहरूको  उपस्थिति रहेको थियो ।

आयोजकका अनुसार, उक्त तयारी कक्षाको उद्देश्य मधेसी समुदायका युवालाई लोकसेवा आयोगद्वारा लिइने परीक्षाको तयारीमा सहयोग पुर्‍याउनु तथा उनीहरूलाई सरकारी सेवामा सहभागी हुन प्रेरित गर्नु हो ।