प्रेस मञ्च नेपाल सप्तरीका नवनिर्वाचित पदाधिकारीहरुको सपथ समारोह सम्पन्न

राजविराज । प्रेस मञ्च नेपाल सप्तरीका नवनिर्वाचित पदाधिकारीहरुको सपथ ग्रहण समारोह शुक्रबार भव्य रूपमा सम्पन्न भएको छ ।

सो अवसरमा जनता समाजवादी पार्टीका केन्द्रीय सदस्य तथा केन्द्रीय प्रचार विभाग उप–संयोजक शम्भु झाले संगठनप्रति दृढ व्यक्तिको अस्तित्व सधैं उच्च रहने भन्दै सबैलाई उच्च मनोबलका साथ अघि बढ्न आग्रह गरे ।

सोही कार्यक्रममा प्रेस मञ्च नेपालका नवनिर्वाचित अध्यक्ष धर्मपाल राउतले नेपाल पत्रकार महासंघ तथा अन्य पत्रकार संगठनहरूसँग सहकार्य गर्दै पत्रकार र संगठनको हकहितका पक्षमा दृढताका साथ कार्य गर्ने प्रतिबद्धता व्यक्त गरे । उनले पत्रकारमाथि हुने दुर्व्यवहार र अन्यायको विरुद्ध अग्रपंक्तिमा रहेर आवाज उठाउने दृढता पनि दोहोर्याए ।

कार्यक्रम प्रेस मञ्च नेपाल सप्तरीका निवर्तमान उपाध्यक्ष जितेन्द्र कुमार झा ‘जीतु’को अध्यक्षतामा सम्पन्न भएको थियो । कार्यक्रममा केन्द्रीय उप महासचिव वैधनाथ यादव, केन्द्रीय सदस्य बृजमान तामाङ, आम सञ्चार प्राधिकरण मधेस प्रदेशका सदस्य नवीन कुमार गुप्ता, नेपाल प्रेस युनियन सप्तरी अध्यक्ष बिनयलाल कर्ण, प्रेस सेन्टर नेपाल सप्तरी अध्यक्ष बिन्दु कुमार यादव लगायतले शुभकामना मन्तव्य व्यक्त गरेका थिए ।

कार्यक्रममा प्रेस सेन्टर नेपालका केन्द्रीय सदस्य तथा प्रेस स्वतन्त्रता सेनानी देवराम यादव, प्रेस मञ्च नेपालका केन्द्रीय सदस्य चन्दन कुमार यादव, नेपाल पत्रकार महासंघका केन्द्रीय परिषद सदस्य मनोज कुमार माझीलगायत विभिन्न सञ्चार माध्यममा आबद्ध पत्रकारहरूको उल्लेखनीय उपस्थिति रहेको थियो ।

समारोहमा नवनिर्वाचित पदाधिकारीहरूलाई केन्द्रीय उपमहासचिव वैधनाथ यादवले सपथ ग्रहण गराएका थिए भने शम्भु झाले प्रमाणपत्र प्रदान गर्दै पदस्थापन सम्पन्न गराएका थिए ।

कार्यक्रम सञ्चालन सचिव प्रवेश कुमार मिश्रले गरेका थिए भने स्वागत मन्तव्य उपाध्यक्ष रूपेश कुमार यादवले प्रस्तुत गरेका थिए ।