राजबिराज नगरपालिका : आन्दोलन कारण सेवाग्राही बञ्चित 

राजबिराज । राजबिराज नगरपालिकामा जारी आन्दोलनकै कारण सेवाग्राहीहरू सेवा पाउनबाट बञ्चित बन्न पुगेका छन् । 

सोमवार पनि राजबिराज नगरपालिकाको बेथिति र अनियमितता, सरूवाको विरोधमा निलम्बित मेयर भीमराज यादवको नेतृत्वमा नगरवासीहरूले ९ बुँदे माग राख्दै तालाबन्दी गरी अनिश्चित कालिन रिले अनशनमा बसेपछि नगरको नियमित कामकाज प्रभावित बनेको छ । 

केही दिन अघि मात्र नगरपालिकामा सरसफाईकर्मी, नगरपालिकाको गाडीको ठक्करबाट घाइते भएका पीडितहरूले आन्दोलन गरेका थिए । दुबै आन्दोलन स्थगित भए लगत्तै नगरपालिकाका कर्मचारीहरू नगरपालिका प्रमुख प्रशासकीय अधिकृत डा. श्रवण साह र योजना अधिकृत मनोज कुमार यादवलाई कारवाही र सरुवा लगायतका ११ बुंदे माग अघि सार्दै  विगत ४ दिन देखी धर्नालाई निरन्तरता दिइदै आएको छ ।  

कार्यवाहक मेयर परवीन कर्मचारीहरूले उठाएको माग जायज भएको भन्दै उनीहरूको पक्षमा उभिएका छन भने निलम्बित मेयर यादव प्रशासकीय अधिकृतलाई सरुवा गरेको विपक्षमा उभिएका छन । 

संघिय मामिला तथा सामान्य प्रशासन मन्त्रालयले प्रमुख प्रशासकीय अधिकृत डा.साहलाई रौतहट सरुवा गरेको छ । मन्त्रालयले निजको ठाँउमा नगरपालिकाका शिक्षा शाखा प्रमुख भोगेन्द्र यादवलाई प्रमुख प्रशासकियको रुपमा काम गर्न जिम्मेवारी दिएपछि विवाद बढेको छ । यता निलम्बित मेयर यादव सोको विरोध गर्दै डा.साहलाई नै सो जिम्मेवारीमा राख्नु पर्ने अडान लिएका छन ।  

उनले सरुवाको विरोधसंगै नगर क्षेत्रमा भएको सिसिटिभी क्यामेरा जडान प्रकरणमा छानविन, नगरको ६८ विगहा क्षेत्रमा ब्लक र विटौरीहरूको परिवारलाई लालपूर्जा प्रदान, हटिया बजारको व्यवस्थापन, नगरका जीर्ण सडक र नालाको मर्मत सम्भार, लामखुट्टे विरुद्धको औषधी छर्किने व्यवस्था लगायतका माग अघि सार्दै धर्नामा बसेको छ ।

 कार्यवाहक नगर प्रमुख परवीन विधिको शासन लागू गर्न मन्त्रालयले खटाएको कर्मचारीलाई हाजिर गराई जिम्मेवारी दिनु पर्ने पक्षमा उभिएकी छिन ।

कार्यवाहक नगर प्रमुख परवीनले निलम्बित मेयर यादव नगरपालिकाको हरेक गतिबीधीमा हस्तक्षेप गरी लाभ लिन खोजेको र आफूले अस्वीकार गर्दा अनावश्यक बखेडा झिकेको आरोप समेत लगाएकी छिन । निलम्बित मेयर यादवले भने नगरपालिकामा आर्थिक अनियमितता गरेको दाबी गर्दै आफू सोको विरोध मात्र गरेको बताएका छन् । 

यता प्रमुख जिल्ला अधिकारी भोला दाहालले नगरपालिका कार्यालयमा शान्ति, सुरक्षा तथा ताला खुलाउन आफूले विशेष पहल गर्ने बताएको छ ।