राजविराजमा मन्त्रालयले पठायो नयाँ प्रमुख प्रशासकीय अधिकृत 

राजविराज । संघीय मामिला तथा सामान्य प्रशासन मन्त्रालयले सप्तरीको राजविराज नगरपालिकामा नयाँ प्रमुख प्रशासकीय अधिकृत खटाएको छ ।

मन्त्रालयले मंगलबार सर्लाहीको हरिपुर्वा नगरपालिकामा कार्यरत हरिकिशोर प्रसाद चन्द्रवंशीलाई राजविराजको प्रमुख प्रशासकीय अधिकृतका रुपमा पठाएको हो ।

यसअघि राजविराज नगरपालिकामा कार्यरत प्रमुख प्रशासकीय अधिकृत श्रवणकुमार साहलाई सरुवा गराई शिक्षा शाखा प्रमुख भोगेन्द्र यादवलाई निमित्तको जिम्मेवारी दिइएको थियो । उनले आजै पदभार ग्रहण गरेका थिए । तर, साहको सरुवा गरी यादवलाई निमित्त दिएको विषयमा नगरमा तिव्र असन्तुष्टि बढेको थियो। यस विषयमा निलम्बित मेयर भीमराज यादवको नेतृत्वमा आन्दोलन समेत चलिरहेको छ ।

यसै क्रममा मङ्गलबार नगरपालिकामा तोडफोड र कर्मचारीमाथि कुटपिट समेत भएको थियो । लगत्तै मन्त्रालयले चन्द्रवंशीलाई प्रमुख प्रशासकीय अधिकृतका रुपमा पठाएको हो ।