चन्दन यादब 
राजविराज । सप्तरीको राजविराजमा सञ्चालन भइरहेको ‘राजविराज मेयर कप सप्तरी महिला प्राइड लिग टी–२० क्रिकेट प्रतियोगिता’ अन्तर्गत बिहीबार सम्पन्न खेलमा खडक क्युईन्सले सुरूगां सरभाइभल्सलाई ५८ रनले पराजित गर्दै शानदार जित हासिल गरेको छ ।
टस जितेर पहिले ब्याटिङ गरेको खडक क्युईन्सले निर्धारित २० ओभरमा ५ विकेटको क्षतिमा १४१ रनको चुनौतीपूर्ण योगफल खडा गर्यो । टोलीका लागि ममता चौधरीले आक्रामक ब्याटिङ गर्दै ६८ रनको उत्कृष्ट पारी खेलिन् भने मोनिका साहले ३७ रनको योगदान दिइन् ।
बलिङतर्फ सुरूगां सरभाइभल्सका लागि दीपा रामले २ विकेट लिइन भने् रोजी खत्री, सानु राजवंशी र सरस्वती चौधरीले समान १–१ विकेट लिएका थिए ।
१४२ रनको लक्ष्य लिएर मैदानमा उत्रिएको सुरूगां सरभाइभल्सको ब्याटिङ कमजोर देखियो । १६ ओभर १ बलमै ८३ रनमा समेटियो । सुरूगांका रोमा थापाले ३७ रन र साना परविनले १८ रन बनाए पनि अरू ब्याटरले उल्लेखनीय प्रदर्शन गर्न सकेनन् ।
खडक क्युईन्सका भुमी सिंह र टीका साहले समान ३–३ विकेट लिए भने ममता चौधरीले २ विकेट हात पारिन् । ममता चौधरीको उत्कृष्ट प्रदर्शनका लागि उनी खेलकी ‘प्लेयर अफ दि म्याच’ घोषित भइन् ।
यस जितसँगै खडक क्युईन्सले प्रतियोगितामा बलियो उपस्थिति जनाउँदै अगाडि बढेको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |