सप्तरीमा युवकको विभत्स हत्या, पोखरी किनारमा शव फेला

राजविराज । सप्तरी जिल्लामा एक युवकको विभत्स हत्या भएको अवस्थामा शव फेला परेको छ ।

डाक्नेश्वरी नगरपालिका–८ का ३२ वर्षीय राजकुमार खंगको शव बिहीबार बिहान डाक्नेश्वरी नगरपालिका र राजगढ गाउँपालिकाको सीमामा पर्ने एक पोखरीको किनारमा फेला परेको हो ।

जिल्ला प्रहरी कार्यालय सप्तरीका प्रवक्ता, प्रहरी नायब उपरीक्षक जितेन्द्र कुमार बस्नेतका अनुसार, मृतकको घाँटीमा धारिलो हतियार प्रयोग गरी हत्या गरिएको प्रारम्भिक अनुसन्धानबाट खुल्न आएको छ । प्रहरीले रातिको समयमा हत्या भएको आशंका गरेको छ ।

हत्या गरिएको स्थलमा प्रहरीको टोलीले अनुसन्धान थालेको छ भने शव पोस्टमार्टमका लागि गजेन्द्रनारायण सिंह अस्पताल, राजविराजमा पठाइएको छ । घटनामा संलग्न व्यक्तिहरूको पहिचान तथा खोजी कार्य तीव्र पारिएको प्रहरीले जनाएको छ ।