चन्दन यादब 
राजविराज । राजविराजमा सञ्चालित ‘राजबिराज मेयर कप सप्तरी महिला प्राइड लिग टी-२० क्रिकेट प्रतियोगिता’ अन्तर्गत लिग चरणको अन्तिम खेलमा सुरूगां विजयी भएको छ । शुक्रबार भएको खेलमा सुरूगांले राजबिराजलाई २३ रनले पराजित गरेको हो ।
टस जितेर सुरूगांले पहिला ब्याटिङ गर्दै २० ओभरमा ३ विकेट गुमाएर १७५ रन बनायो । टोलीका लागि रोमा थापाले उत्कृष्ट प्रदर्शन गर्दै ४४ बलमा ११ चौकाको मद्दतले ७४ रन बनाइन्। राष्ट्रिय खेलाडी साना परविनले ४१ रनको योगदान दिइन्।
बलिङतर्फ राजबिराजका चाँदनी खातुन र साक्षी यादवले १/१ विकेट लिए।
१७६ रनको लक्ष्य लिएर मैदानमा उत्रिएको राजबिराजले २० ओभरमा ५ विकेट गुमाउँदै १५२ रन मात्र बनाउन सक्यो। टोलीका लागि सिवानी साहले ५४ रन, प्रियन्सा राना मगरले ३६ रन, प्रदिमा साहले २८ रन, र अपेक्षा यादवले २१ रन बनाइन् ।
बलिङतर्फ सुरूगांका सरस्वती चौधरीले २ विकेट तथा रोजी खत्री र बिदिया रामले १र१ विकेट लिए ।
खेलकी ‘प्लेयर अफ द म्याच’ सुरूगांकी रोमा थापा घोषित भइन् । उनलाई सप्तरी क्रिकेट संघका सचिव चन्दनकुमार यादवले ट्रफी तथा नगद १ हजार ५ सय रुपैयाँ प्रदान गरे ।
प्रतियोगिता संयोजक रोशन मण्डलका अनुसार लिग चरणको आधारमा सर्वाधिक अंक ल्याएका राजबिराज र खडक टिम फाइनलमा प्रवेश गरेका छन् । फाइनल खेल शनिबार बिहान ९ बजे राजबिराज र खडकबीच हुनेछ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |