राजबिराज मेयर कप महिला लिगको उपाधि राजबिराजको कब्जामा

राजबिराज । राजबिराजमा सञ्चालित राजबिराज मेयर कप सप्तरी महिला प्राइड लिग टी-२० क्रिकेट प्रतियोगिताको उपाधि आयोजक टिम राजबिराज रोयल्सले हात पारेको छ ।

फाइनल खेलमा राजबिराज रोयल्सले खडक क्विन्सलाई ५ विकेटले पराजित गर्दै उपाधिमा कब्जा जमाएको हो ।

राजबिराजको जितमा मुख्य भूमिका निर्वाह गरेकी अपसरी बेगमले उत्कृष्ट ब्याटिङ गर्दै ६२ रन बनाइन् । अर्की ब्याटर अपेक्षा यादवले पनि ३३ रन बनाएर टोलीलाई जित नजिक पुर्‍याइन् ।

शनिवार राजबिराजस्थित पविमाबी खेलमैदानमा भएको फाइनल खेलमा खडक क्विन्सले टस जितेर पहिला ब्याटिङ गर्दै निर्धारित २० ओभरमा ७ विकेट गुमाएर १२९ रनको योगफल तयार गरेको थियो ।

खडकका तर्फबाट ममता चौधरीले उत्कृष्ट ब्याटिङ गर्दै ४९ बलमा ९ चौकाको मद्दतले ६२ रन बनाइन् । त्यस्तै टीका साहले ३७ रन तथा अलिसा यादवले १८ रनको योगदान दिइन् ।

बलिङतर्फ राजबिराज रोयल्सका अपेक्षा यादवले २ विकेट लिइन् भने सिवानी साह र साक्षी यादवले समान रूपमा १/१ विकेट हात पारिन् ।

१३० रनको लक्ष्य पछ्याएको राजबिराजले १८ ओभरमा ५ विकेट गुमाउँदै लक्ष्य पुरा गर्‍यो । अपसरी बेगमले ६२ रन बनाइन्, अपेक्षा यादवले ३३ रन तथा चाँदनी खातुनले १२ रनको योगदान दिइन् ।

बलिङतर्फ खडक क्विन्सका भूमी सिंहले २ विकेट लिइन् भने मोनिका सिंह र सुस्मिता यादवले १/१ विकेट हात पारे।

प्रतियोगिताको फाइनल खेलमा प्लेयर अफ द म्याच अपसरी बेगम घोषित भइन् । त्यस्तै, बेस्ट ब्याटर ममता चौधरी, बेस्ट बलर भूमी सिंह र प्लेयर अफ द सिरिज अपसरी बेगम घोषित भएका छन् ।

उपाधिसँगै विजेता र उपविजेता टोलिहरूलाई राजबिराज नगरपालिकाका कावानगरप्रमुख ईसरत परविन, सप्तरी क्रिकेट संघका अध्यक्ष आयुष श्रेष्ठ, नेपाल क्रिकेट संघका सेलेक्टर मुर्तजा हवाडी, राजबिराज वडा नं. ४ की वडा सदस्य राजेश्वरी थापा, वडा नं. ५ का वडा सदस्य सन्तोष मण्डललगायत अतिथिहरूले ट्रफी, शिल्ड, प्रमाणपत्र तथा नगद पुरस्कार वितरण गरेका थिए ।

कार्यक्रमको सञ्चालन सप्तरी क्रिकेट संघका सचिव चन्दनकुमार यादवले गरेका थिए ।