नयाँ प्रहरी प्रमुखको प्रतिबद्धता : सप्तरीमा अपराध नियन्त्रण, शान्ति र सुशासन स्थापित गर्ने

राजविराज । सप्तरीका नव नियुक्त प्रहरी प्रमुख (एसपी) गौतम कुमार केसीले जिल्लाको शान्ति सुरक्षा, अपराध नियन्त्रण, सेवा प्रवाह र सुशासनलाई प्रमुख प्राथमिकतामा राखेर काम गर्ने प्रतिबद्धता जनाएका छन् ।

मंगलबार जिल्ला प्रहरी कार्यालय राजविराजमा सञ्चारकर्मीहरूसँग आयोजित अन्तरक्रिया कार्यक्रममा बोल्दै एसपी केसीले आर्थिक, सामाजिक तथा साइबर अपराधका साथै अपराध नियन्त्रणमा विशेष ध्यान दिने बताएका हुन् ।

“अपराधीविरुद्ध कानुनी कठोरता अपनाइनेछ, सबैलाई कानुनी दायरामा ल्याइनेछ,” एसपी केसीले भने, “जिल्लामा अमनचयन कायम गर्न प्रतिबद्ध भएर अघि बढ्नेछु ।”

कार्यक्रममा नेपाल पत्रकार महासंघ शाखा सप्तरीका अध्यक्ष श्रवण देवले सभ्य समाज निर्माणमा प्रहरीको भूमिकाको खाँचो औंल्याउँदै नव प्रहरी प्रमुखले सकारात्मक उदाहरण प्रस्तुत गर्नुपर्ने सुझाव दिए ।

“पत्रकारहरू सूचना, सुरक्षा र सम्मानको अपेक्षा राख्छन्,” उनले भने, “त्यसअनुसार व्यवहार र सहकार्य हुनुपर्छ ।” अध्यक्ष देवले शान्ति सुरक्षाको क्रममा गलत व्यक्ति वा सूचना आधारमा कारबाही नहोस् भन्नेमा सचेत रहन सुझावसमेत दिए ।

अन्तरक्रियामा सहभागी सञ्चारकर्मीहरूले जिल्लाको शान्ति सुरक्षा, अपराध नियन्त्रण तथा प्रहरी सेवाको प्रभावकारिता विषयमा आफ्ना सुझाव र धारणा राखेका थिए ।

एसपी केसीले सबैको सहकार्यमा शान्तिपूर्ण र अपराधमुक्त सप्तरी बनाउने उद्देश्यसहित अघि बढ्ने प्रतिबद्धता दोहोर्याए ।