चन्दन यादब 
राजविराज । सप्तरीको प्रतिष्ठित क्रिकेट प्रतियोगिता ‘मेयर कप सप्तरी प्रिमियर लिग’ (एसपीएल) को सातौं संस्करण बिहीबारबाट सुरु भएको छ । पहिलो दिन सम्पन्न दुई खेलमध्ये राजबिराज राजदेवी रोयल र बजाज खडक वारियर्सले विजयी सुरुवात गरेका छन् ।
पहिलो खेलमा राजबिराज राजदेवी रोयलले कंचनपुर राइनोजलाई ३७ रनले पराजित गर्यो । टस जितेर पहिले ब्याटिङ गरेको राजबिराजले निर्धारित १५ ओभरमा ५ विकेटको क्षतिमा १२० रन बनायो । दिवान पुनले २६ बलमा ४१ रन बनाए भने सदाम आलमले अविजित २१ रन, रोहन विकले १८ र प्रविन यादवले १५ रनको योगदान दिए । बलिङतर्फ कंचनपुरका अभिमन्यु सरदारले २ विकेट लिए भने राशिद खान, मुकेश सिंह र रौनक सिंहले समान १/१ विकेट लिए ।
जवाफमा कंचनपुर राइनोज १५ ओभरमा ६ विकेट गुमाउँदै ८३ रनमै सीमित भयो। रौनक सिंहले २५, प्रविन भुजेलले १९ र महानन्द यादवले ११ रन बनाए । राजबिराजका दिवान पुन र अभिषेक तिवारीले समान २ विकेट तथा मो. सोहेल र शिव दासले १/१ विकेट लिए । उत्कृष्ट प्रदर्शन गरेका दिवान पुन खेलको म्यान अफ द म्याच घोषित भए ।
त्यसै दिन सम्पन्न दोस्रो खेलमा बजाज खडक वारियर्सले रुपनी राइडर्सलाई २६ रनले पराजित गर्दै विजयी भयो । टस जितेर ब्याटिङ गरेको खडकले २० ओभरमा १३७ रन बनायो । अनिल कुमार यादवले ४४ रन, पप्पु यादव ‘ए’ ले अविजित १९ रन, सन्तोष कार्कीले ११ र गोपाल मण्डलले नटआउट १० रन बनाए । बलिङतर्फ रुपनीका नविन मण्डलले ३, अशोक मेहताले २ र विशाल पटेल तथा इमरान शेखले समान १/१ विकेट लिए ।
१३८ रनको लक्ष्य पछ्याउन मैदान उत्रेको रुपनी राइडर्स १८ ओभर ५ बलमा सबै विकेट गुमाएर १११ रनमै समेटियो। इमरान शेखले २९ बलमा ४० रन बनाए भने महेश माझीले २३ र बिक्की चौधरीले १४ रन जोडे । खडकका अभिषेक कार्की, फिर्दोस अंसारी र पप्पु यादव ‘बि’ ले समान २/२ विकेट तथा बाबु गोठिया, पप्पु यादव ‘ए’ र गोपाल मण्डलले १/१ विकेट लिए । खेलको म्यान अफ द म्याच पप्पु यादव ‘बि’ घोषित भए ।
प्रतियोगिताको उद्घाटन राजबिराज नगरपालिका प्रमुख इसरत परवीनले ब्याटिङ, तिरहुत गाउँपालिका अध्यक्ष विजय यादवले बलिङ र प्रमुख जिल्ला अधिकारी भोला दहालले किपिङ गरेर गरे। सप्तरी क्रिकेट संघका अध्यक्ष आयुष श्रेष्ठको अध्यक्षतामा भएको उद्घाटन समारोहमा विभिन्न स्थानीय जनप्रतिनिधि, सुरक्षा निकायका प्रमुख र संघका पदाधिकारीहरूको उपस्थिति रहेको थियो ।
कार्यक्रमको सञ्चालन सप्तरी क्रिकेट संघका सचिव चन्दनकुमार यादवले गरेका थिए भने स्वागत मन्तव्य संघका सदस्य अशोक साहले दिएका थिए ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |