सप्तरी प्राइड लिग: तिरहुतको लगातार दोस्रो जित

राजविराज । सप्तरीको राजविराजमा जारी सप्तरी प्राइड लिग अन्तर्गत तेस्रो दिनको पहिलो खेलमा तिरहुत टाइगर्सले खडक वारियर्सलाई पराजित गर्दै लगातार दोस्रो जित दर्ता गरेको छ ।

पबी स्कुल मैदानमा सम्पन्न समूह ‘बि’ अन्तर्गतको खेलमा खडक वारियर्सले दिएको ६७ रनको लक्ष्य तिरहुत टाइगर्सले १३.३ ओभरमा ५ विकेट गुमाएर भेट्टायो ।

लक्ष्य पछ्याउने क्रममा टाइगर्सका ओपनर अविनाश कर्णले सर्वाधिक २६ रनको योगदान दिए । उनले १८ बलमा ३ चौका र २ छक्का प्रहार गरेका थिए। यस्तै, राहुल मण्डलले अविजित रहँदै २० रन बनाए, जसमा उनले २० बलमा ३ चौका प्रहार गरे ।

यसअघि, टस जितेर ब्याटिङ गरेको खडक वारियर्सले १५.५ ओभरमा ६६ रनमै सबै विकेट गुमाएको थियो। टोलीका लागि अनिल कुमार यादवले सर्वाधिक १५ रन, सन्तोष कार्कीले ११ रन र फिर्दोश अन्सारीले १० रन बनाए। बाँकी ब्याटरहरू दोहोरो अंकमा पुग्न सकेनन्।

टाइगर्सको बलिङमा श्रवण यादव र अजय यादवले समान ३-३ विकेट लिए। श्रवणले ३.५ ओभरमा मात्र ६ रन खर्चेर उत्कृष्ट प्रदर्शन गरे भने अजयले ४ ओभरमा १४ रन दिए ।  यस्तै, चित्रबहादुर बिष्टले २ विकेट तथा अनिल यादवले १ विकेट लिए । खेलको ‘प्लेयर अफ द म्याच’ श्रवण यादव घोषित भए ।