सप्तरी प्राइड लिग: राजदेवी रोयलको शानदार जित, हनुमाननगर हिरोज ६६ रनले पराजित

राजविराज । राजविराजमा जारी सप्तरी प्राइड लिग अन्तर्गत शनिबार सम्पन्न दोस्रो खेलमा राजविराज राजदेवी रोयलले हनुमाननगर हिरोजलाई ६६ रनले पराजित गरेको छ ।

राजदेवी रोयलले निर्धारित २० ओभरमा ७ विकेट गुमाउँदै १४५ रनको चुनौतीपूर्ण लक्ष्य प्रस्तुत गरेको थियो । जवाफी ब्याटिङमा उत्रिएको हनुमाननगर हिरोज १८.३ ओभरमा जम्मा ७९ रनमै अलआउट भयो ।

हनुमाननगरका लागि आठौं नम्बरमा ब्याटिङ गर्न आएका सकिब खानले सर्वाधिक २० रन बनाए । उनले २० बलमा दुई चौका प्रहार गरेका थिए । ओपनर सनत खड्गाले १६ रन र शिबन यादवले १४ रन बनाएका थिए । अन्य ब्याटरले भने उल्लेखनीय प्रदर्शन गर्न सकेनन् । हनुमानगरले १५ रन अतिरिक्तको रूपमा पाएको थियो ।

राजदेवी रोयलका बलरहरूद्वारा उत्कृष्ट प्रदर्शन गरिएको थियो । दिवान पुनले ४ विकेट लिँदै हनुमाननगरको मध्य र तल्लो क्रम धरासायी बनाएका थिए । त्यस्तै, मोहम्मद सकिम आलम र जितु यादवले समान २–२ विकेट लिए भने अभिषेक तिवारी र मोहम्मद सोहेलले समान १–१ विकेट झारे ।

त्यसअघि टस जितेर पहिले ब्याटिङ गरेको राजदेवीले पावरप्लेमै राम्रो सुरुवात गरेको थियो। ओपनर प्रविन यादवले १४ रन र रोहन विकले २४ रन बनाए। तल्लोक्रमका नितेश यादवले २२ रनको योगदान दिएका थिए भने दिवान पुन ३९ रनमा अविजित रहे । उनले ३८ बलमा तीन चौका प्रहार गरेका थिए । राजदेवीले अतिरिक्तमार्फत २७ रन प्राप्त गरेको थियो ।

हनुमाननगरको बलिङमा सञ्जन बैठले ३ विकेट, सञ्जीव मण्डलले २ विकेट र शिबन यादवले १ विकेट लिए ।