चन्दन यादब 
राजविराज । डिभिजन वन कार्यालय, सप्तरीले पर्यटकलाई आकर्षित गर्न फतेपुरमा सुविधासम्पन्न हरित पार्क निर्माण गरिरहेको छ ।
आइतवार डिभिजन वन कार्यालय सप्तरीको अगुवाइमा सञ्चारकर्मी, वन कर्मचारी तथा पदाधिकारीहरूको संयुक्त अनुगमन टोलीले सप्तकोशी नगरपालिका–१ स्थित फतेपुर वन क्षेत्रमा निर्माणाधीन हरित पार्कको अनुगमन तथा निरीक्षण गरेको हो ।
अनुगमनका क्रममा टोलीले रक्तमाला नमूना सामुदायिक वन उपभोक्ता समूहद्वारा निर्माण गरिएको ट्री हाउस तथा हरित पार्कको अवलोकन र मूल्यांकन गरेको थियो ।
डिभिजन वन कार्यालयका प्रमुख सुभाष चन्द्र दासका अनुसार, उक्त हरित पार्कमा अोर्नामेन्टल (सजावटी) बिरुवा रोपण, पोखरी निर्माण, पिकनिक स्थल, ट्री हाउसलगायत पूर्वाधार विकास गरिँदैछ, जसले पर्यटकलाई आकर्षण गर्नुका साथै मनोरञ्जनको माध्यम पनि बन्नेछ ।
उनका अनुसार, कूल ३७४ हेक्टर वन क्षेत्रमध्ये ५ हेक्टर क्षेत्रलाई पर्यटकीय विकासका लागि छुट्याइएको छ । सो क्षेत्रलाई पिकनिक स्थल तथा पारिवारिक घुमघामको उपयुक्त गन्तव्य बनाउनका लागि विकास कार्य अघि बढाइएको हो ।
डिभिजन वन कार्यालय, राजविराजको २४ लाख रुपैयाँ लागतमा सामुदायिक वन उपभोक्तामार्फत बिरुवा रोपण, तारबार निर्माण, पोखरी, ट्री हाउस, प्राङ्गारिक मल उत्पादनलगायतका गतिविधि सञ्चालन गरिने जानकारी दिइएको छ ।
यसै क्रममा अनुगमन टोलीले फतेपुरस्थित सव-डिभिजन वन कार्यालय परिसरमा “समृद्धिका लागि वन कार्यक्रम” अन्तर्गत पातपतिंगर, झाडी आदिको व्यवस्थापन गरी प्राङ्गारिक मल उत्पादन भइरहेको कार्यस्थल पनि निरीक्षण गरेको थियो । नेपाल पत्रकार महासंघ सप्तरीका अध्यक्ष तथा अनुगमन टोलीका सदस्य श्रवण देवले उक्त जानकारी दिएका हुन् ।
त्यस्तै, कञ्चनरुप नगरपालिका स्थित सव-डिभिजन वन कार्यालय परिसरमा विभिन्न जात तथा प्रजातिका बिरुवाहरूको पनि निरीक्षण गरिएको छ ।
उक्त अनुगमन टोलीमा प्रेस स्वतन्त्रता सेनानी वैधनाथ झा, देवराम यादव, महासंघका शाखा उपाध्यक्ष रामनारायण विश्वास, डिभिजन वन कार्यालयकी अधिकृत पिंकी मेहता, रेन्जर अमित पोखरेल, पंकज मिश्रसहित वन उपभोक्ता समूहका सदस्यहरू र दर्जनौं सञ्चारकर्मीहरूको सहभागिता रहेको थियो ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |