सप्तरी प्राइड लिग : राजविराज राजदेवी रोयल र तिरहुत टाइगर्स फाइनलमा

राजविराज । राजविराजमा जारी सातौँ संस्करणको मेयर कप सप्तरी प्राइड लिग क्रिकेट प्रतियोगितामा राजविराज राजदेवी रोयल र तिरहुत टाइगर्स फाइनलमा प्रवेश गरेका छन् ।

बुधबारको दुवै सेमीफाइनल खेल अविरल वर्षाका कारण रद्द भएपछि समूह चरणका विजेता दुई टोली राजविराज राजदेवी रोयल र गत संस्करणका विजेता तिरहुट टाइगर्स फाइनलमा स्थान बनाउन सफल भए ।

राजदेवी रोयल र खडक वारियर्सबीचको पहिलो सेमीफाइनल तथा तिरहुट टाइगर्स र कञ्चनरुप राइनोजबीचको दोस्रो सेमीफाइनल वर्षाका कारण स्थगित भयो। दुवै खेलमा टससमेत हुन सकेन ।

८ टोली सहभागी प्रतियोगितामा टिमहरूलाई दुई समूहमा विभाजन गरिएको थियो। समूह ‘ए’ बाट राजविराज राजदेवी रोयलले ३ खेलमा ५ अंक हासिल गर्दै समूह विजेताको रूपमा सेमीफाइनलमा प्रवेश गरेको हो ।

समूह ‘बी’ मा तिरहुट टाइगर्सले ३ खेलमा पूर्ण ६ अंक जोड्दै समूह विजेता बन्दै अन्तिम चारमा पुगेको थियो ।

समूह ‘ए’ बाट कञ्चनरुप राइनोज ३ खेलमा ४ अंक जोड्दै उपविजेता बनेको थियो भने समूह ‘बी’ बाट खडक वारियर्सले पनि ३ खेलमा ४ अंक जोड्दै सेमीफाइनल यात्रा तय गरेका थिए ।

सप्तरी क्रिकेट संघद्वारा आयोजित प्रतियोगिताको विजेता टिमले नगद २ लाख रुपैयाँ पुरस्कार पाउनेछ भने उपविजेता टोलीले १ लाख रुपैयाँ प्राप्त गर्नेछ ।