पोस्टमार्टमका लागि राखिएको शव आफन्तहरू बलजफ्ती लिएर फरार

राजविराज । सप्तरीको गजेन्द्रनारायण सिंह अस्पताल राजविराजमा पोस्टमार्टमका लागि राखिएको शव मृतकका आफन्तहरूले बलजफ्ती लिएर फरार भएका छन् ।

विष्णुपुर गाउँपालिका–१ की ४५ वर्षीया मसुरन खातुन राजगढ गाउँपालिका–३ नर्घोस्थित माइतीघरमा धान रोप्ने क्रममा अचेत भइ उपचारका लागि छिन्नमस्ता अस्पताल, राजविराज ल्याइएको थियो । उपचारको क्रममा उनको मृत्यु भएपछि प्रहरीले शव पोस्टमार्टमका लागि गजेन्द्रनारायण अस्पतालमा राखेको थियो । तर, शुक्रबार साँझ एक समूहले अस्पतालमा तोडफोड गर्दै बलपूर्वक शव लिएको हो ।

प्रहरी रोक्न प्रयास गर्दा झडपसमेत भएको थियो । जिल्ला प्रहरी कार्यालयका अगाडिबाटै शव लिएर जाँदा पनि प्रहरीले समूहलाई रोक्न सकेन ।