मेयरबाट धम्की खेपेका पत्रकार मृत अवस्थामा फेला

जनकपुरधाम । रौतहटको कटहरिया नगरपालिका–५ का करिब ३० वर्षीय पत्रकार रबिन्द्र प्रजापति शनिबार साँझ आफ्नै घरमा झुण्डिएको अवस्थामा मृत फेला परेका छन् । उनलाई परिवारले तत्कालै पासो काटी अस्पताल लगेको भए पनि चिकित्सकले मृत घोषणा गरेका थिए ।

गरुडा म्यूजिकल एफएममा कार्यरत पत्रकार प्रजापति समाचार लेख्ने र पढ्ने काममा संलग्न थिए । केही दिन अघि कटहरिया नगरपालिकाको खानेपानी समस्याबारे समाचार लेखेकै कारण मेयर अजयप्रकाश जयसवालबाट धम्की र गालीगलौज खेपेको बताइएको छ । त्यसपछि उनी तनावमा रहेको र डरका कारण घरबाहिर ननिस्किएको स्थानीयहरूले बताएका छन् ।

प्रेस चौतारी रौतहटले जेठ २९ मा विज्ञप्ति जारी गर्दै मेयर जयसवालद्वारा दिइएको धम्कीप्रति आपत्ति जनाउँदै छानबिन गरी कारबाहीको माग गरेको थियो । यद्यपि इलाका प्रहरी कार्यालय गरुडाका डीएसपी राजन कार्कीले भने मेयरले धम्की दिएको भन्नेबारे जानकारी नभएको र घटनाको अनुसन्धान भइरहेको जानकारी दिएका छन् ।