पूर्वप्रदेश प्रमुख राजेश झा बलात्कार आरोपमा पक्राउ

काठमाडौं । मधेश प्रदेशका पूर्वप्रदेश प्रमुख राजेश झा (अहिराज) बलात्कार आरोपमा काठमाडौंबाट पक्राउ परेका छन् । उनलाई आइतबार काठमाडौं प्रहरी परिसरको विशेष टोलीले पक्राउ गरेको हो ।

झामाथि एक महिलाले बलात्कारको उजुरी दिएपछि अनुसन्धानको क्रम सुरु गरिएको प्रहरीले जनाएको छ । प्रहरीले प्रारम्भिक विवरण गोप्य राख्दै घटनाको संवेदनशीलता र अनुसन्धान प्रभावित नहोस् भन्ने कारण देखाएको छ ।

झा पूर्वराष्ट्रपति विद्यादेवी भण्डारीद्वारा मधेश प्रदेशको प्रमुखमा नियुक्त भएका थिए । उनी मधेश राजनीतिमा लामो समयदेखि क्रियाशील रहेका व्यक्ति हुन् र राजनीतिक पहुँच भएका व्यक्तिका रूपमा चिनिन्छन् ।

पक्राउ परेपछि उनलाई महानगरीय प्रहरी वृत्त टेकुमा राखेर अनुसन्धान थालिएको छ । पीडित महिलाको उजुरीका आधारमा अनुसन्धान अघि बढाइएको प्रहरी स्रोतले जनाएको छ ।

प्रहरीका अनुसार आवश्यक प्रमाण संकलन, चिकित्सकीय परीक्षण तथा बयानका आधारमा मुद्दा अगाडि बढाइनेछ। यस विषयमा औपचारिक विवरण सार्वजनिक गर्ने तयारी भइरहेको छ ।

पूर्वप्रदेश प्रमुख जस्तो उच्च ओहदाको व्यक्तिमाथि यस्तो गम्भीर आरोप लाग्नुले राजनीतिक वृत्तमा पनि चासो र बहस उत्पन्न गराएको छ । घटनाको निष्पक्ष छानबिन र कानुनी प्रक्रिया अघि बढाउनुपर्ने आवाजहरू समेत उठिरहेका छन् ।