सिसीटीभीमा कैद हत्या, जुली प्रहरी नियन्त्रणमा, विवाहेत्तर सम्बन्धको त्रासदी

जनकपुरधाम । वैदेशिक रोजगारीबाट फर्किएका महोत्तरी गाउँपालिका-१ पर्साका २८ वर्षीय विमलेश यादवको जनकपुरस्थित एक होटलमा रहस्यमय परिस्थितिमा मृत्यु भएको छ । प्रारम्भिक अनुसन्धान अनुसार, उनको हत्या योजनाबद्ध रुपमा गरिएको हुनसक्ने आशंका प्रहरीले गरेको छ ।

शनिबार राति करिब ९ बजेर ५५ मिनेट जाँदा विमलेश जनकपुरको ‘एसपी एण्ड गेष्ट हाउस’ होटलमा एक युवतीसँग प्रवेश गरेका थिए । त्यसपछि आइतबार बिहान २ बजेर ५७ मिनेटमा उनी नग्न र रक्ताम्य अवस्थामा होटलको पहिलो तलाबाट खसेका देखिन्छन् । सिसीटीभी फुटेजमा केही मिनेटपछि ती युवती तल ओर्लिएर दायाँबायाँ हेर्दै घटनास्थलबाट भागेको दृश्य देखिएको छ ।

घाइते अवस्थामा रहेका विमलेशले प्रहरीसँग बयान दिएका थिए र आफू हिँडेरै एम्बुलेन्स चढेको फुटेज पनि क्यामेरामा देखिन्छ । तर बिहान सवा सात बजे प्रादेशिक अस्पताल जनकपुरमा उनको मृत्यु भएको पुष्टि भएको छ ।

धनुषा प्रहरीले घटनामा संलग्न भएको आशंकामा महोत्तरीकै बलवा नगरपालिकाकी २४ वर्षीया जुली झालाई आइतबार दिउँसो पक्राउ गरेको छ । प्रहरीले हाल उनलाई हिरासतमा राखेर अनुसन्धान गरिरहेको छ । अनुसन्धानमा संलग्न एक अधिकृतका अनुसार, घटनाको प्रारम्भिक रूपले योजनाबद्ध हत्या जस्तो देखिएको छ ।

विमलेश र जुलीबीच विगत तीन वर्षदेखि सम्बन्ध रहेको खुलेको छ । दुई वर्षअघि फोन कुराकानीका कारण दुबै पक्षबीच विवाद भएपछि जिल्ला प्रहरी कार्यालयमा उजुरी परेको थियो । त्यसपछि उनीहरूले आपसमा सम्पर्क नगर्ने सहमति समेत गरेका थिए । तर त्यसपछि पनि उनीहरूबीच सम्बन्ध कायमै रहेको र विदेशबाट पठाइएको झण्डै २७ लाख रुपैयाँ जुलीले लिएको कुरा पारिवारिक स्रोतले जनाएको छ ।

पछिल्लो समय भने जुलीले सम्बन्ध अन्त्य गर्ने कुरा उठाएपछि विमलेशले आफूले पठाएको रकम फिर्ता मागेका थिए । यही विषयले दुईबीच तनाव चुलिएको थियो । प्रहरीले आर्थिक लेनदेन र विगतको सम्बन्धलाई घटनाको मुख्य आधार मानेर अनुसन्धान गरिरहेको छ ।

यसैबीच, मृतकका आफन्तहरूले होटलको सिसीटीभी फुटेजमा १७ सेकेन्ड हराएको भन्दै शंका व्यक्त गरेका छन् र अनुसन्धान अझै व्यापक बनाइनु पर्ने माग गरेका छन् । प्रहरी स्रोतले भने घटनाको सबै पक्षलाई समेटेर निष्पक्ष अनुसन्धान भइरहेको जनाएको छ ।