भूषण सिहं 
राजविराज । महेन्द्र विन्देश्वरी बहुमुखी क्याम्पस (मविव), राजविराजको परीक्षा केन्द्र सिरहाको लहान सारिएको विरोधमा विद्यार्थीहरू आन्दोलित बनेका छन् ।
स्वतन्त्र विद्यार्थी युनियन (स्ववियु) को अगुवाइमा मंगलबार बिहान क्याम्पस गेटमा टायर बाल्दै विद्यार्थीहरूले प्रदर्शन गरेका हुन् ।
शुरुवातमा विज्ञान संकायको परीक्षा केन्द्र सारिएकोमा असन्तुष्टि व्यक्त गरेका विद्यार्थीहरू एलएलबी र व्यवस्थापन संकायको पनि परीक्षा केन्द्र लहान सारिएपछि थप आक्रोशित बनेका छन् । स्ववियु सभापति रञ्जित यादवका अनुसार राजविराजमा पर्याप्त पूर्वाधार हुँदाहुँदै परीक्षा केन्द्र निजी क्याम्पसमा सार्नु त्रिविको बदनियतपूर्ण निर्णय हो ।
विद्यार्थीहरूले चर्को नाराबाजी गर्दै परीक्षा केन्द्र पुनः राजविराजमै कायम गर्न माग गरेका छन् । अन्यथा आन्दोलन अझ कडा बनाउने चेतावनी पनि दिएका छन् ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |