कोशी नहर सेवा सडक निर्माणकाे टेन्डर प्रक्रिया सुरू, डा. राउतको पहल प्रभावकारी

राजविराज । जनमत पार्टीका राष्ट्रिय अध्यक्ष माननीय डा. सीके राउतको निरन्तर पहल, दबाब र कूटनीतिक प्रयासका कारण कोशी पश्चिमी नहरको सेवा सडक (सर्भिस रोड) निर्माण कार्य भारत सरकारले प्राथमिकतामा राखेको छ ।

संसद, ऊर्जा, जलश्रोत तथा सिचाईं मन्त्रालय हुँदै प्रधानमन्त्री कार्यालय र भारतीय दूतावास लगायत सम्बन्धित निकायहरूसँग गरिएको निरन्तर संवादपछि यो योजना कार्यान्वयनको चरणमा पुगेको हो ।

भारत सरकारको बजेट व्यवस्थापनमा समावेश भएको यस योजनाअन्तर्गत, बिहार सरकारअन्तर्गत जल संसाधन विभाग, पश्चिमी कोशी नहर अवर प्रमंडल, कुनौली, सुपौलका ईन्चार्ज इन्जिनियर युवराज अमनका अनुसार अबको एक महिनाभित्र निर्माण कार्य सुरु हुने जनाइएको छ ।

उनका अनुसार नहरको ४.२३ किलोमिटरदेखि ३५.१३ किलोमिटर खण्डसम्म कुल ३० किलोमिटर लम्बाइको सेवा सडक ३.७५ मिटर चौडाइमा कालोपत्रे गरिनेछ। साथै, दुबै छेउमा ०.७५ मिटर चौडाइको सोल्जर स्ट्रिप (किनाराको भाग) रहनेछ । हाल उक्त निर्माणको लागि टेन्डर आह्वानको प्रक्रिया अगाडि बढिसकेको छ ।

स्थानीयवासीले यो परियोजना सुरु हुन लागेकोमा स्वागत गरेका छन् । सेवा सडक निर्माण सम्पन्न भएपछि नहर क्षेत्र आसपासका बस्तीहरूमा आवागमन सहज हुनुका साथै आर्थिक, सामाजिक तथा पूर्वाधार विकासमा ठूलो टेवा पुग्ने अपेक्षा गरिएको छ ।