गजेन्द्रनारायण सिंह अस्पतालमा नयाँ नियुक्ति, सुधारको आशा कि फेरि पुरानै चलन ?

राजविराज । राजविराजस्थित गजेन्द्रनारायण सिंह अस्पतालमा वर्षौंदेखि मौलाउँदै आएको माफियाकै प्रभावका कारण सेवा प्रवाहमा गिरावट आएको गुनासो रहँदै आएको छ ।

स्वास्थ्य सेवा सुधारको नाममा पटक–पटक पहलहरू भए तापनि दीर्घकालीन समाधान देखिएको छैन । अस्पताल लथालिङ्ग अवस्थामा पुगेको भन्ने आरोपबीच हालै अस्पताल विकास समितिले १७ जना स्टाफ नर्स र १ जना फिजियोथेरापिस्टको नियुक्ति गरेको छ ।

यी नियुक्तिलाई कतिपयले अस्पताल सुधारको सकारात्मक संकेतका रूपमा हेरेका छन् भने, अर्कोतर्फ फेरि पनि ‘आसेपासे’ र पहुँचवालालाई प्राथमिकता दिइएको आरोप पनि उठ्न थालेको छ । “अस्पतालभित्र माफियाहरू धेरै पहिलादेखि नै छन्, व्यवस्थापन सुधारबिना केवल नयाँ कर्मचारी थपेर मात्र सेवामा गुणस्तर आउँदैन,” एक स्थानीय नागरिकको भनाइ छ ।

अब जनताको चासोको केन्द्रमा एउटा महत्वपूर्ण प्रश्न उभिएको छ – के अस्पताल विकास समितिले गरेको नियुक्तिले अस्पतालमा साँच्चिकै सकारात्मक परिवर्तन ल्याउनेछ ? के यसले अस्पतालको बिग्रँदै गएको सेवा प्रणालीलाई सुधार्ने दिशामा टेवा पुर्‍याउनेछ ?

वर्षौंदेखि अस्पतालमा देखिएको अव्यवस्था, पहुँच र सञ्जालको चलखेल, र माफिया प्रवृत्तिको पकडले जनताको स्वास्थ्य अधिकारमाथि ठुलो प्रश्न चिन्ह खडा गरिरहेको बेला भएको यो नियुक्ति कत्तिको प्रभावकारी हुनेछ भन्नेमा सबैको चासो बढेको छ ।

यदि यी नियुक्तिहरू निष्पक्ष, पारदर्शी र योग्य व्यक्तिहरूको छनोटका आधारमा गरिएको हो भने यसले निःसन्देह अस्पतालको सेवा प्रणालीमा सुधार ल्याउन सक्छ । तर, यदि यो पनि विगतका जस्तै पहुँचवालाको भागबण्डा, नातावाद र राजनैतिक दबाबमा गरिएको हो भने, जनताले फेरि एक पटक धोका मात्र पाउनेछन् ।

त्यसैले अबको प्रश्न केवल नियुक्तिको संख्यामा सीमित छैन, यो नियुक्तिको प्रभाव, कार्यसम्पादन र सेवा सुधारमा देखिने व्यवहारिक परिणामले मात्र यस प्रश्नको उत्तर दिनेछ – के अस्पताल साँच्चिकै सुध्रिनेछ ? कि फेरि पनि माफिया शैली र अस्वस्थ चलनले नै अस्पतालको दिशा निर्धारण गर्नेछ ?

स्थानीयबासीले स्वागत र शंका दुवै दृष्टिकोणबाट हेरेका छन् यो कदमलाई । सुधारको नाममा लिइएका निर्णयहरु कतिसम्म प्रभावकारी हुनेछन् भन्ने कुराले अबको सेवा गुणस्तरले मात्र प्रमाणित गर्नेछ ।