सप्तरीको कुशहामा शिक्षकको शव फेला, नहरछेउ मृत अवस्थामा भेटिए

राजविराज । सप्तरीको डाक्नेश्वरी नगरपालिका वडा नम्बर ६ कुशहामा एक  शिक्षकको शव नहरछेउ फेला परेको छ । मृतक २७ वर्षीय रामकिसुन राय स्थानीय चन्देश्वर रायका छोरा हुन् ।

विहीबार बेलुकी ६ बजे घरबाट निस्किएका राय रातभर सम्पर्कमा नआएपछि परिवार तथा स्थानीयले खोजी सुरु गरेका थिए । खोजतलासका क्रममा शुक्रवार बिहान करिब ६ः३० बजे सोही ठाउँस्थित कोशी नहरको छेउमा उनको शव फेला परेको हो ।

घटनाको जानकारी पाएपछि इलाका प्रहरी कार्यालय पातो र कल्याणपुरबाट खटिएको संयुक्त प्रहरी टोली घटनास्थलमा पुगेर प्रारम्भिक अनुसन्धान पछि मृतकको शव पोस्टमार्टमका लागि राजविराजस्थित गजेन्द्रनारायण सिंह अस्पताल पठाइएको छ ।

हाल घटनाको प्रकृति र कारणबारे थप अनुसन्धान भइरहेको प्रहरीको भनाइ छ । मृतक राय स्थानिय विद्यालयमा शिक्षकको रूपमा कार्यरत रहेको जनाइएको छ । घटनाले स्थानीयमा सनसनी फैलिएको छ ।