राजेन्द्र मिश्र 
जनकपुरधाम । प्रेस जनमत संघको केन्द्रीय समितिको बैठक तथा प्रशिक्षण कार्यक्रम जनकपुरधाममा साउन ८ र ९ गते सम्पन्न भएको छ ।
संघका अध्यक्ष श्री अवधेशकुमार झाको अध्यक्षतामा सम्पन्न उक्त कार्यक्रममा जनमत पार्टीका अध्यक्ष माननीय डा. सीके राउत, उपाध्यक्ष डा. जयकान्त राउत, मधेश प्रदेशका मुख्यमन्त्री सतिशकुमार सिंह, वन तथा वातावरण मन्त्री संजयकुमार यादव, पार्टी प्रवक्ता डा. शरदसिंह यादव, प्रदेश अध्यक्ष रामस्नेही यादव र धनुषा जिल्ला अध्यक्ष सुरेन्द्र मण्डल लगायत विशिष्ट नेताहरूको उपस्थिति रहेको थियो ।
बैठकले ९ बुँदे ‘जनकपुरधाम घोषणा पत्र – २०८२’ सार्वजनिक गरेको छ। उक्त घोषणापत्रमा संघीय लोकतान्त्रिक प्रणालीको सुदृढीकरण, ‘नौलो गणतन्त्र’ को अवधारणा, पत्रकार अधिकारको संरक्षण, सञ्चार अधिकारको विकेन्द्रिकरण तथा मधेशमा सञ्चारमाध्यमहरूमाथिको विभेद अन्त्य लगायत विषय समेटिएको छ ।
प्रेस जनमत संघले प्रेस स्वतन्त्रता, सामाजिक न्याय र समाजवादको पक्षमा उभिने प्रतिवद्धता दोहोर्याएको छ । संघीय शासनअनुसार सञ्चार अधिकार प्रदेशमै कार्यान्वयन हुनु पर्ने, श्रमजीवी पत्रकार ऐनको पूर्ण कार्यान्वयन, न्यूनतम पारिश्रमिकको सुनिश्चितता तथा पत्रकारहरूमाथि हुने अन्याय रोक्न कानुनी सुधार आवश्यक रहेको बैठकले औंल्याएको छ ।
प्रेस काउन्सिल नेपाल अझै पनि केन्द्रिकृत रहेको भन्दै संघले त्यसमा संघीयता कार्यान्वयनको माग गर्दै मधेशमाथि हुने विभेद अन्त्यको माग राखेको छ । पत्रकार महासंघमा निष्पक्ष सदस्यता वितरणको आवश्यकता र सरकारी सञ्चारमाध्यममा मधेशलाई प्राथमिकता दिनुपर्ने कुरा पनि उठाइएको छ ।
मधेश प्रदेश सरकारले संघीयता र मधेश केन्द्रित सन्देश फैलाउन आफ्नै मिडिया हाउस स्थापना गर्नुपर्ने सुझाव दिँदै, लोककल्याणकारी विज्ञापनको बजेट वृद्धि र पत्रकारहरूका लागि बीमा कार्यक्रम लागू गर्न संघले माग गरेको छ ।
संघले भदौ १ गतेदेखि मधेश प्रदेशका जिल्लाबाट संगठन विस्तारको अभियान प्रारम्भ गर्ने र केन्द्रीय सम्पर्क कार्यालय जनकपुरधाममा सञ्चालन गर्ने निर्णय पनि गरेको छ । उक्त कार्यालयको संयोजन सचिव ललन मण्डल, सदस्य मनोज कुमार मोरबैता र चन्दन रजकले गर्ने छन् ।
बैठकमा श्रद्वेय अध्यक्ष डा. राउतसहित शीर्ष नेताहरूको उपस्थितिले कार्यक्रमलाई उत्साहजनक बनाएको भन्दै प्रेस जनमत संघले सबै अतिथिप्रति आभार व्यक्त गरेको छ ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |