मुख्यमन्त्री सिंहद्वारा मधुश्रावणी पर्वको अवसरमा मिथिलावासीलाई शुभकामना

जनकपुरधाम । मधेश प्रदेशका मुख्यमन्त्री सतिश कुमार सिंहले मैथिल समुदायको धार्मिक तथा सांस्कृतिक पहिचानसँग जोडिएको महत्वपूर्ण पर्व मधुश्रावणीको अवसरमा समस्त मिथिलावासीलाई शुभकामना दिएका छन् ।

एक शुभकामना सन्देश जारी गर्दै मुख्यमन्त्री सिंहले मधुश्रावणी पर्वलाई श्रद्धा, समर्पण र अनुशासनको प्रतीकको रूपमा उल्लेख गरेका छन्। उनले भने, “यो पवित्र व्रत प्रेम, समर्पण र संस्कृतिप्रतिको अटूट श्रद्धाको प्रतीक हो ।”

मुख्यमन्त्री सिंहले मैथिल नारीहरूद्वारा पति दीर्घायु, पारिवारिक सुख-समृद्धि र वैवाहिक जीवनमा सौहार्दता कायम गर्न श्रद्धापूर्वक मनाइने यस पर्वलाई मिथिलाको गौरवशाली सांस्कृतिक परम्पराको रुपमा वर्णन गरे ।

उनले मधुश्रावणीलाई केवल धार्मिक अनुष्ठान नभई मिथिला समाजको लोकसंस्कृति, लोकविश्वास र जीवित परम्पराको अभिन्न अंश भएको बताए। साथै, यस पर्वले सामाजिक एकता, सहअस्तित्व र आत्मीयता प्रवर्द्धन गर्न महत्वपूर्ण भूमिका निर्वाह गर्दै आएको उनले उल्लेख गरे ।

मुख्यमन्त्री सिंहले सम्पूर्ण मैथिल समाजमा प्रेम, विश्वास, स्वास्थ्य र समृद्धिको अटुट बन्धन कायम रहोस् भन्ने शुभेच्छा समेत व्यक्त गरे ।