सार्वजनिक स्थानमा टेलिकम बाहेकको वाईफाई बन्द हुने, प्राधिकरणको नयाँ नियम लागू

काठमाडौं । अब सार्वजनिक स्थानहरूमा टेलिकम कम्पनी बाहेक अन्य संस्थाहरूले स्वतन्त्र रूपमा वाईफाई सेवा प्रदान गर्न नपाउने भएका छन् । नेपाल दूरसञ्चार प्राधिकरणले “वाईफाई हटस्पट सञ्चालन विनियमावली २०७५” संशोधन गर्दै यस्तो नयाँ व्यवस्था ल्याएको हो ।

प्राधिकरणका अनुसार दूरसञ्चार, मोबाइल वा आधारभूत टेलिफोन सेवामा संलग्न नभएका अन्य निजी संस्था, कम्पनी वा व्यवसायहरूले सार्वजनिक स्थानमा सञ्चालन गरिरहेको वाईफाई सेवा बन्द गर्नुपर्नेछ ।

तर, केही सर्तसहित वाईफाई सञ्चालनको सुविधा भने दिइने प्राधिकरणले स्पष्ट पारेको छ । संशोधित विनियमावलीअनुसार अब होटल, रेस्टुरेन्ट, विमानस्थल, बसपार्क, अस्पताल, सपिङ मल, उद्यान, बगैंचाजस्ता सार्वजनिक स्थानमा, यदि ती संस्थाहरूले आफूले ओगटेको भवन वा कम्पाउण्डभित्र सीमित दायरामा सेवा दिन चाहेमा अनुमति प्राप्त गरी वाईफाई सञ्चालन गर्न सक्नेछन् ।

यस्तै, एकपटकमा सीमित अवधिको लागि वा निश्चित संख्यामा मात्रै सार्वजनिक ठाउँमा हटस्पट जडान गर्न पाइने व्यवस्था यथावत राखिएको प्राधिकरणले जनाएको छ ।

प्राधिकरणको भनाइमा, यस निर्णयले वाईफाई सेवा सुरक्षित, नियन्त्रणमा र दुरुपयोगरहित बनाउने उद्देश्य लिएको छ । यसले प्रयोगकर्ताको गोपनीयता संरक्षण, साइबर सुरक्षाको मजबुती र टेलिकम क्षेत्रको स्पष्ट व्यवस्थापनमा मद्दत पुर्‍याउने विश्वास गरिएको छ ।

यो नियमसँगै अब सार्वजनिक स्थानहरूमा सहजै उपलब्ध वाईफाई सेवा सिमित हुने सम्भावना बढेको छ। उपभोक्ताले सार्वजनिक वाईफाई उपयोग गर्दा थप सजग र वैधानिक ढाँचामा सेवा पाउने अपेक्षा गरिएको छ ।