मधेश सरकारद्वारा ऐतिहासिक बीमा कार्यक्रम सुरु, नागरिक सुरक्षा प्रणालीमा नयाँ युगको सुरुवात

जनकपुरधाम । सामाजिक सुरक्षा सुनिश्चित गर्ने र नागरिकको जीवनस्तरमा गुणात्मक सुधार ल्याउने उद्देश्यसहित मधेश प्रदेश सरकारले ऐतिहासिक बीमा कार्यक्रम सुरु गरेको छ । साउन १ गतेदेखि लागू गरिएको घरधुरी बीमा र नागरिक बीमा योजनाले प्रदेशको सामाजिक सुरक्षा प्रणालीमा नयाँ अध्यायको सुरुवात गरेको छ ।

मुख्यमन्त्री सतिश कुमार सिंह नेतृत्वको सरकारले अगाडि सारेको यो योजना पहिलो चरणमा एक लाख घरधुरी र ६ हजार ६ सय नागरिकलाई बीमा सुरक्षा दायरामा समेट्दै सुरु गरिएको हो । बीमा सुरक्षाका लागि झण्डै ५९ अर्ब १० करोड रुपैयाँ बराबरको व्यवस्था गरिएको छ, जुन प्रदेश सरकारको सामाजिक सुरक्षा नीतिमा एक ठूलो उपलब्धि मानिएको छ ।

यस बीमा योजनाले विशेषगरी आम नागरिक र सिमान्तकृत वर्गलाई प्राकृतिक विपद्, दुर्घटना तथा आकस्मिक मृत्युजस्ता घटनाबाट सुरक्षा प्रदान गर्ने उद्देश्य राखेको छ । घरधुरी बीमा अन्तर्गत आगलागी, चट्याङ, बाढी, पहिरो, आँधीहुरी लगायतका आपतकालीन घटनाबाट हुने क्षतिको क्षतिपूर्ति प्रदान गरिनेछ, जसको अधिकतम सीमा पाँच लाख रुपैयाँ तोकिएको छ । त्यस्तै नागरिक बीमा अन्तर्गत आकस्मिक मृत्यु, शारीरिक अपांगता तथा दुर्घटनाजन्य घाइते भएका व्यक्तिहरूलाई दश लाख रुपैयाँसम्मको बीमा सुविधा दिइनेछ ।

बीमा दाबी गर्नको लागि सम्बन्धित व्यक्तिले साक्ष्यसहितको निवेदन, प्रहरी प्रतिवेदन वा अस्पतालको रिपोर्ट, स्थानीय पालिकाको सिफारिस र प्रदेशको नागरिक भएको प्रमाण पेश गर्नुपर्ने व्यवस्था गरिएको छ । मधेश सरकारका अनुसार पारदर्शी र सहज कार्यविधिमार्फत पीडित नागरिकहरूले सजिलै राहत प्राप्त गर्न सक्नेछन् ।

मुख्यमन्त्रीका प्रेस सल्लाहकार अवधेश झाका अनुसार यो कार्यक्रम केवल सहानुभूतिको अभिव्यक्ति होइन, राज्यको नागरिकप्रतिको उत्तरदायित्व र सामाजिक न्यायप्रतिको प्रतिबद्धता हो । मधेश सरकारले पहिलोपटक यति व्यापक बीमा योजना लागू गरेको हुँदा यसबाट दीगो सामाजिक सुरक्षा प्रणाली निर्माणमा सकारात्मक टेवा पुग्ने विश्वास लिइएको छ ।

सरकारले बीमा कार्यक्रममार्फत प्राप्त हुने सुविधाबाट लाभ लिन सबै नागरिकहरूलाई आग्रह गर्दै आफ्नो सुरक्षाको प्रत्याभूति लिन आह्वान समेत गरेको छ ।