करेन्ट लागेर दम्पतिको मृत्यु : पीडित परिवारको घरमै पुगेर बीमा प्रक्रिया थाले प्रदेश सरकार

राजविराज । सप्तरीको रूपनी गाउँपालिका–२ पौंवा टोलका बालेश्वर खंग र उनकी श्रीमती रामकुमारी खंगको करेन्ट लागेर मृत्यु भएपछि पीडित परिवारका लागि मधेश प्रदेश सरकारले नागरिक बीमा सुविधाको पहल सुरु गरेको छ ।

गत शुक्रबार साँझ सिटी रिक्सा चार्ज गर्ने क्रममा करेन्ट लाग्दा बालेश्वरको घटनास्थलमै मृत्यु भएको थियो भने उनलाई बचाउन गएकी उनकी श्रीमतीको पनि ज्यान गएको थियो ।

दैनिक मजदुरीमा जीविका चलाउँदै आएका खंग दम्पतिको निधनले परिवार शोकमा डुबेको बेला प्रदेश सरकारले नागरिक बीमा कार्यक्रम अन्तर्गत राहत उपलब्ध गराउने कार्य अगाडि सारेको हो ।

आज मधेश प्रदेश सरकारको उच्चस्तरीय टोली घटनास्थल पुगेर पीडित परिवारसँग भेटघाट गर्दै समवेदना प्रकट गरेको छ । टोलीमा खेलकुद तथा समाजकल्याण मन्त्रालयका निमित्त सचिव रञ्जित कुमार यादव, मुख्यमन्त्रीका प्रेस सल्लाहकार अवधेश कुमार झा, मन्त्रालयका उपसचिव धर्मेन्द्र लाल कर्ण र बीमा कम्पनीका प्रतिनिधिहरू सहभागी थिए ।

टोलीले बीमा सुविधा प्राप्त गर्न आवश्यक कागजात संकलनको कार्य सुरु गरेको जानकारी दिँदै प्रक्रिया सहज बनाउन स्थानीय तह र अन्य सम्बन्धित निकायहरूसँग समन्वय भइरहेको जनाएको छ ।

बीमा टोलीले खंग परिवारलाई मधेश प्रदेश सरकारले साउन १ गतेदेखि लागू गरेको नागरिक बीमा कार्यक्रम अन्तर्गत आवश्यक राहत तथा सहारा प्रदान गरिने जानकारी गराएको छ । साथै प्रदेश सरकार जनताको सुख–दुःखमा साथ रहने नीति अनुरूप यस्ता विपद्को घडीमा पीडितको घरदैलोमै पुगेर सहयोग गर्न तत्पर रहने प्रतिबद्धता पनि जनाएको छ ।