जसपा नेपाल सप्तरीको अध्यक्षमा त्रिपक्षीय प्रतिस्पर्धा, साउन १७ गते चुनाव

राजविराज । जसपा नेपाल सप्तरीको एकता प्रथम अधिवेशनको बन्द सत्रमा सहमति जुट्न नसकेपछि अध्यक्ष पदमा त्रिपक्षीय प्रतिस्पर्धा हुने भएको छ ।

जिल्ला अध्यक्ष पदका लागि वर्तमान अध्यक्ष केदार यादव, उपाध्यक्ष उमेशकुमार यादव र सचिव हरेराम यादवबीच कडा प्रतिस्पर्धा हुने भएको हो ।

बन्द सत्रमार्फत जिल्ला कार्यसमिति चयनको प्रयास सफल नभएपछि चुनावी प्रक्रियाबाट कार्यसमिति चयन गरिने निर्वाचन समितिले जनाएको छ ।

निर्वाचन तालिका अनुसार साउन १५ गते अन्तिम मतदाता नामावली प्रकाशित गरिएको छ। साउन १६ गते उम्मेदवारी दर्ता, उम्मेदवारको नामावली प्रकाशन, दाबी विरोध तथा अन्तिम नामावली प्रकाशन गरिनेछ ।

साउन १७ गते शनिवार बिहान ७ बजेदेखि दिउँसो ३ बजेसम्म मतदान हुनेछ भने सोही दिन मतगणना सम्पन्न गरिने निर्वाचन समितिले जानकारी दिएको छ ।