जनमत पार्टी सप्तरीको जिल्ला समन्वय समितिको पहिलो बैठक सुरु

राजविराज । जनमत पार्टी सप्तरीले शनिबार जिल्ला समन्वय समितिको पहिलो बैठक सुरु गरेको छ ।

राजविराज–८ स्थित ग्रीनल्यान्ड पार्टी प्यालेस, मदननगरमा आयोजित बैठक पार्टीका राष्ट्रिय उपाध्यक्ष तथा संगठन विभाग प्रमुख डा. जय कान्त राउतको प्रमुख आतिथ्यमा सुरु भएको हो ।

बैठकमा जिल्ला समन्वय समितिका सबै सदस्यहरू, सप्तरी जिल्लाभरका स्थानीय तहका पालिका अध्यक्षहरू तथा वडा अध्यक्षहरूको अनिवार्य उपस्थिति रहेको जनाइएको छ ।

पार्टीका सप्तरी इन्चार्ज राम गमन साहका अनुसार बैठकमा सहभागी हुने सबैले आफ्नो नाम स्पष्ट देखिने गरी नागरिकता वा परिचयपत्र अनिवार्य रूपमा साथमा राख्नुपर्ने व्यवस्था गरिएको थियो ।

बैठकमा संगठनात्मक समन्वय, स्थानीय तहमा पार्टीको सक्रियता, भावी रणनीति तथा पार्टी संगठन सुदृढीकरणका विषयमा विस्तृत छलफल गरिने जनाइएको छ ।

यस बैठकमार्फत पार्टीले आगामी दिनमा अपनाउने नीतिगत दिशा, स्थानीय तहसँगको सम्बन्ध सुदृढ गर्ने उपाय र सांगठनिक विस्तारलाई प्राथमिकता दिने तयारी गरेको छ ।