जसपा नेपाल सप्तरीको निर्वाचन स्थगित मनोनयनमा सहमति नजुट्दा मतदान प्रक्रिया अवरुद्ध

राजविराज । जनता समाजवादी पार्टी (जसपा) नेपाल सप्तरीको जिल्ला अधिवेशन अन्तर्गतको निर्वाचन स्थगित गरिएको छ । आज आइतवार बिहान ८ बजेबाट सुरु हुने भनिएको मतदान जिल्ला निर्वाचन समितिले विशेष सूचनामार्फत स्थगित गरेको हो ।

एक नेताका अनुसार पालिकाबाट जिल्ला सदस्य पदमा उम्मेदवारीका विषयमा सहमति नजुटेकै कारण निर्वाचन कार्यतालिका प्रभावित भएको हो । उनका अनुसार केदार प्रसाद यादवको प्यानलका उम्मेदवारहरू अधिकांश पालिकामा एकल रुपमा मनोनयन दर्ता गरिएकाले उनीहरूलाई निर्विरोध घोषणा गर्नुपर्ने माग गरिएको थियो । तर, निर्वाचन समिति त्यसका लागि तयार नभएपछि विवाद चुलिएको हो।

उमेशकुमार यादव पक्षले भने २५ वटै जिल्ला सदस्य पदमा खुला प्रतिस्पर्धा हुनुपर्ने अडान राख्दै आएको छ । जसपाको निर्वाचन निर्देशिका अनुसार प्रत्येक पालिकाबाट कम्तीमा एक जना जिल्ला सदस्य अनिवार्य रहने व्यवस्था छ ।

निर्देशिका अनुसार केदार पक्षबाट सबै पालिकामा उम्मेदवारी दर्ता गरिएका छन् भने उमेश पक्षबाट पालिका प्रतिनिधिमा उम्मेदवारी दिइएको छैन । शनिबार दुबै पक्षले उम्मेदवारी दर्ता गराए पनि विवाद गहिरिँदै गएपछि निर्वाचन समितिले उम्मेदवारको अन्तिम नामावलीसमेत अझै प्रकाशन गर्न सकेको छैन ।

निर्वाचनमार्फत सात पदाधिकारी, १८ भूगोल, १८ महिला र ७ जना समावेशी समूह गरी कुल ५७ सदस्यीय जिल्ला नेतृत्व चयन गरिनेछ। जसका लागि कुल ५१५ जना प्रतिनिधिले मतदान गर्ने तयारी थियो ।