जसपा नेपाल सप्तरीको नेतृत्वमा फेरि केदार यादव, निर्वाचनले देखायो तीव्र प्रतिस्पर्धा

राजविराज । जनता समाजवादी पार्टी (जसपा) नेपाल सप्तरीको नेतृत्वमा पुनः केदार यादव निर्वाचित भएका छन् । यसपटकको अधिवेशनमा नेतृत्व चयन सहमतिमै हुने अपेक्षा गरिएको भए पनि अन्ततः प्रतिस्पर्धी निर्वाचनमार्फत टुंगो लाग्यो। निर्वाचनको नतिजाले नेतृत्वमा पुनरागमन सम्भव भए पनि पार्टीभित्र तीव्र प्रतिस्पर्धा रहेको संकेत दिएको छ ।

हिजो सम्पन्न निर्वाचनको मतगणना आज सकिएको हो । केदार यादवले २३५ मत प्राप्त गर्दै आफ्नो पुरानो पद सुरक्षित गरेका हुन् भने उनका प्रतिस्पर्धी उमेश यादवले २०५ मत प्राप्त गरे ।

उपाध्यक्ष पदमा दुबै प्यानलका उम्मेदवार विजयी भएका छन् — केदार पक्षबाट लक्ष्मण यादव र उमेश पक्षबाट हरेराम यादव। सचिव पदमा भने रोचक परिणाम देखिएको छ । उमेश प्यानलका निरज मुक्ति मात्र १ मतको अन्तरले विजयी भए — उनले २३१ मत ल्याउँदा शम्भु यादवले २३० मत प्राप्त गरे ।

१४ साउनदेखि सुरु भएको जिल्ला अधिवेशनमा सहमतिमा नेतृत्व चयनको प्रयास असफल भएपछि निर्वाचनको बाटो रोजिएको थियो । जसपा नेपालका केन्द्रीय अध्यक्ष उपेन्द्र यादवले अधिवेशनको उद्घाटन गरेका थिए ।

यस निर्वाचनले जसपाभित्र नेतृत्वको प्रतिस्पर्धा अझै कायम रहेको र सहमतिको राजनीति अझै कठिन चुनौतिमा रहेको स्पष्ट संकेत दिएको छ ।