निलम्बनपछि पनि सुध्रिएनन् दीपक साह, पार्टीले गर्‍यो पूर्ण निष्कासन

राजविराज । जनमत पार्टीले आफ्नै पूर्वसक्रिय नेता दीपक कुमार साहमाथि संगठन विरोधी गतिविधिमा संलग्न भएको आरोप लगाउँदै कठोर निर्णय लिएको छ । पार्टीले उनलाई साधारण सदस्यताको हकसमेत नरहने गरी पूर्णरूपमा निष्कासित गरेको छ ।

यसअघि साहलाई पार्टीले ६ महिनाको लागि निलम्बन गरेको थियो । तर उक्त अवधिभर पनि उनले पार्टी विरोधी अभिव्यक्ति, कार्य, र भेला जारी राखेको भन्दै अनुशासन समितिले थप कठोर निर्णय लिएको हो ।

पार्टीका उपाध्यक्ष तथा अनुशासन समितिका संयोजक ई. नरेंन्द्र प्रसाद चौधरी र सचिव अनिता कुमारी मण्डलद्वारा हस्ताक्षरित पत्रमा उल्लेख भएअनुसार, साहले पटक–पटक पार्टीको नीति, विधान, र नेतृत्वप्रति अवज्ञा गर्दै संगठनात्मक अनुशासनको उल्लंघन गरेका थिए ।

उनमाथि लागेको आरोपहरूमा पार्टीको बैठक बहिस्कार गर्नु, पार्टी निर्णय र कार्यक्रमको अवज्ञा गर्दै स्वतन्त्र गतिविधि सञ्चालन गर्नु, पार्टीको नाम र छाप दुरुपयोग गर्नु, र विभिन्न ठाउँमा जनमत पार्टीको विरुद्ध नाराबाजी गर्नुजस्ता कार्य समावेश छन् ।

२०७९ चैत ११ गते स्पष्टीकरण सोधिएको भए पनि साहले समयमै जवाफ नदिएको र जवाफको भाषा तथा आशय समेत असन्तोषजनक रहेको पार्टीको दाबी छ ।

पार्टीले सार्वजनिक गरेको निर्णयपत्र अनुसार, साहले गरेको निरन्तर अनुशासनहीनता तथा पार्टीविरोधी गतिविधिले संगठनको आन्तरिक एकता, छवि, र अनुशासनमा गम्भीर असर पारिरहेको हुँदा कठोर कदम चाल्नु परेको उल्लेख छ ।

संगठनको शुद्धीकरण अभियानअन्तर्गत जनमत पार्टी पछिल्ला दिनमा अनुशासनको सवालमा कुनै सम्झौता नगर्ने रणनीतिमा देखिएको छ । साहमाथिको कारबाहीलाई त्यसैको निरन्तरता स्वरूप हेरिएको छ ।

यस निष्कासनसँगै साहको राजनीतिक भविष्य अब कुन दिशातर्फ मोडिन्छ भन्ने चासो पनि राजनीतिक वृत्तमा उत्पन्न भएको छ । जनमत पार्टीभित्रको अनुशासन र आन्तरिक व्यवस्थापनप्रति समेत प्रश्न उठ्ने बेला पार्टीले देखाएको कडापनले भावी रणनीतिमा गम्भीर सन्देश दिएको विश्लेषण भइरहेको छ ।