राजविराज–सखडा सडक निर्माणको माग गर्दै पैदल यात्रा

राजविराज । राजविराज–सखडा–गोबिन्दपुर सम्म सडक निर्माणको माग गर्दै स्थानीयवासीहरूले आज बिहान दबाबस्वरूप पैदल यात्रा गरेका छन् ।

सप्तरीको छिन्नमस्ता गाउँपालिका–३ सखडामा नेकपा माओवादी केन्द्र जिल्ला कार्य समिति, सप्तरीको आयोजनामा पूर्व सिंचाई मन्त्री तथा जिल्ला इन्चार्ज उमेश कुमार यादवको नेतृत्वमा करिब २५ जना कार्यकर्ताको सहभागितामा यात्रा प्रारम्भ भएको हो ।

सहभागीहरूले “कता छ सरकार, कता छ ठेकेदाररु”, “सडक तुरुन्त निर्माण गर”, “सम्माननीय प्रधानमन्त्रीज्यू, कुशासनको नमूना हेर्न आउने होइन तरु” जस्ता नारा लेखिएका ब्यानर र पम्प्लेटसहित प्रदर्शन गरेका थिए ।

छिन्नमस्ता मन्दिरको मुख्य गेटबाट सुरु भएको यात्रा सखडा हुँदै राजविराज–गोबिन्दपुर सडक खण्डमा पुगेको थियो । यसको उद्देश्य लामो समयदेखि अधुरो रहेको उक्त सडकको तत्काल निर्माण गराउन सरकार र ठेकेदारलाई दबाब दिनु रहेको आयोजकहरूले बताएका छन् ।

स्थानीयवासीका अनुसार ठेकेदारको लापरवाहीका कारण सडक अधुरै रहेकाले आवागमनमा असुविधा मात्र नभई जनजीवनमा गम्भीर असर पर्न थालेको छ । विशेषगरी वर्षायाममा सडक हिलाम्मे भएर यातायात अवरुद्ध हुने र साना–ठूला दुर्घटना हुने गरेको उनीहरूको गुनासो छ ।

सडक डिभिजन कार्यालय लहान र ठेकेदार कम्पनीले पटक–पटक निर्माण पूरा गर्ने प्रतिबद्धता जनाए पनि कामले गति लिन सकेको छैन। रुपनी–छिन्नमस्ता २२ किलोमिटर सडकका लागि बोलपत्र आह्वान भए तापनि निर्माण कार्य अड्किएको स्थानीयहरू बताउँछन् ।

माओवादी केन्द्रले सडक निर्माणमा देखिएको ढिलाइलाई “जनताप्रति अन्याय” भन्दै सरोकारवालालाई जिम्मेवारीपूर्वक छिटो काम सम्पन्न गर्न चेतावनी दिएको छ ।