मुख्यमन्त्री सिंहद्वारा गजेन्द्र नारायण सिंह औद्योगिक क्षेत्र अवलोकन

राजविराज । मधेश प्रदेशका मुख्यमन्त्री सतिशकुमार सिंहले गजेन्द्र नारायण सिंह औद्योगिक क्षेत्रमा ठूला उद्योग स्थापनाका लागि पर्याप्त सम्भावना रहेको बताएका छन् ।

मंगलवार उक्त औद्योगिक क्षेत्रको अवलोकन तथा निरीक्षण गर्दै मुख्यमन्त्री सिंहले ठूला उद्योग स्थापना भए रोजगारीका अवसर सिर्जना हुने, राजस्व संकलनमा वृद्धि हुने र स्थानीयदेखि राष्ट्रिय आर्थिक विकासमा महत्वपूर्ण योगदान पुग्ने विश्वास व्यक्त गरे ।

उनले मधेश प्रदेश सरकार औद्योगिक क्षेत्रको समग्र विकासमा प्रतिबद्ध रहेको उल्लेख गर्दै उद्योगपतिहरूलाई यस क्षेत्रमा लगानी गर्न निरन्तर आग्रह गरिरहेको स्पष्ट पारे ।

मुख्यमन्त्री सिंहका अनुसार ढल निकास, खानेपानीलगायतका आधारभूत पूर्वाधार समस्याको समाधानका लागि चालु आर्थिक वर्षमा प्रदेश सरकारले ८० लाख रुपैयाँ विनियोजन गरिसकेको छ । साथै, सुरक्षाका लागि आवश्यक सुरक्षाकर्मीको व्यवस्था गर्न पहल भइरहेको पनि जानकारी दिए ।

निरीक्षणका क्रममा गजेन्द्र नारायण सिंह औद्योगिक क्षेत्र व्यवस्थापन कार्यालयका कार्यवाहक प्रमुख मनिष कुमार मिश्र र उद्योगी मिलन सिंहले मुख्यमन्त्री सिंहलाई औद्योगिक क्षेत्रको वर्तमान अवस्था र विद्यमान समस्याबारे विस्तृत जानकारी गराए ।

वि.सं. २०४४ सालमा स्थापना भएको यस औद्योगिक क्षेत्रमा हाल १२ वटा उद्योग सञ्चालनमा छन् भने थप १० वटा प्लट नयाँ उद्योग स्थापनाको प्रतिक्षामा रहेका छन् ।