राजनीतिक प्रभावको आडमा ठगी, राहुल मण्डल पुर्पक्षका लागि थुनामा

सप्तरी । राजनीतिक प्रभावको आडमा ठगी गर्दै आएको आरोपमा हनुमाननगर कंकालिनी नगरपालिका–१० का राहुल मण्डललाई जिल्ला अदालत सप्तरीले पुर्पक्षका लागि थुनामा राख्ने आदेश दिएको छ ।

माननीय न्यायाधीश महेन्द्र बहादुर क्षेत्रीको इजलासले बिहीवार प्रारम्भिक सुनुवाइपछि मण्डललाई कारागार चलान गर्न आदेश दिएको हो । यसअघि अदालतले ठगी मुद्दामा मण्डलविरुद्ध पक्राउ पुर्जी जारी गर्दै ३५ दिने सार्वजनिक सूचना प्रकाशित गरेको थियो । सोही अनुसार उनलाई विहिवार अदालतमा हाजिर गराइएपछि सुनुवाइ सम्पन्न भएको हो ।

जिल्ला सरकारी वकिलको कार्यालयले दायर गरेको मुद्दाअनुसार, मण्डलले नक्कली लिखत र झुटा कागजात प्रयोग गरी एक महिलाको सम्पत्ति हडप्ने प्रयास गरेका थिए ।

मण्डलको राजनीतिक यात्रा माओवादी केन्द्रबाट सुरू भई जनता समाजवादी पार्टी (जसपा) नेपाल सम्म पुगेको हो । उनले २०७४ र २०७९ सालको स्थानीय तह निर्वाचनमा मेयर पदमा उम्मेदवारी दिएका थिए, तर दुवैपटक पराजित भएका थिए ।