राजविराजमा विशाल रथयात्रा भए पनि सार्वजनिक विदा नपाउँदा नागरिकहरू असन्तुष्ट

राजविराज । क्यालेण्डरमा कृष्ण जन्माष्टमी तोकिए पनि यस वर्ष मधेश प्रदेश सरकारले सार्वजनिक विदा दिएको छैन ।

जन्माष्टमी पर्व क्यालेण्डर अनुसार शनिबार परेको भए पनि आज आइतबार पूजा पाठ र परम्परागत रथयात्रा निकालिने दिन हो । तर सार्वजनिक विदा नदिँदा नागरिकहरू र कर्मचारीहरू प्रभावित भएका छन् । सप्तरी जिल्लामा कंचनरूप नगरपालिका र महादेवा गाउँपालिकाबाहेक अन्य स्थानीय तहहरूले सार्वजनिक विदा दिएका छैनन् ।

सप्तरीको सदरमुकाम राजविराजमा प्रत्येक वर्ष हजारौं नागरिकको सहभागितामा विशाल रथयात्रा आयोजना हुन्छ। तर यस वर्ष विदा नदिँदा रथयात्रामा सहभागी हुन चाहने कर्मचारी र अन्य पेशामा संलग्न नागरिकहरूले सहभागी हुन पाएका छैनन्, आयोजक समितिले जनाएको छ ।

राजविराज नगरप्रमुख इसरत परविनले जन्माष्टमीको अवसरमा सार्वजनिक विदा दिन सकिने बताए ।