राजबिराजमा कृष्ण जन्माष्टमीको अवसरमा भव्य रथ यात्रा

राजबिराज । कृष्ण जन्माष्टमीको अवसरमा राजबिराजस्थित राधाकृष्ण मन्दिर, बिहारपुरबाट भव्य रथ यात्रा निकालिएको छ । आइतबार आयोजित रथ यात्रा मुल समारोह समिति राजबिराजले आयोजना गरेको हो ।

उक्त रथ यात्रामा राजबिराज नगरका हजारौं नागरिकहरूले सहभागिता जनाएका थिए । रथ यात्रा रूपनी मोड, हनुमान मन्दिर, गुलाब ग्यारेज, यदुबन्सी चौक, राजदेवी मन्दिर, राजदेबी चौक, तेतरी गाछी, नेता चौक, गजेन्द्र चौक, राम मन्दिर हुँदै पुनः बिहारपुरस्थित राधाकृष्ण मन्दिरमा समापन गरिएको आयोजक समितिका संयोजक अनिल यादवले जानकारी दिएका छन् ।

ज्ञानयोग, कर्मयोग र भक्तियोगका प्रणेता भगवान् श्रीकृष्णको जन्म द्वापरयुगमा भाद्र कृष्ण अष्टमीको मध्यरातमा भएको हुँदा आजको दिन ‘श्रीकृष्ण जन्माष्टमी’ र रातलाई ‘मोहरात्रि’ भनिन्छ । यस दिन देशभरिका कृष्ण मन्दिरहरूमा पूजा–आराधना, प्रवचन, भजन–कीर्तनको आयोजना हुने प्रचलन छ । विशेष गरी महिला–पुरुष दुवैले व्रत बसेर रातभर जाग्रण बस्ने प्रचलन छ ।

कृष्ण पुराणका अनुसार, भाद्र महिनाको कृष्ण अष्टमीको दिन माता देवकीको आठौं सन्तानको रूपमा भगवान् श्रीकृष्णको जन्म भएको थियो । मथुराको जेलमा जन्मेका कृष्णलाई राजा कंस मार्न चाहन्थे, तर वासुदेवले बालक कृष्णलाई गोपालको टोकरीमा राखेर गोकुलपुरतर्फ लगे। यस क्रममा यमुना नदीको बाढी, शैशानागको संरक्षण लगायत धेरै अवरोध आए पनि कृष्ण सुरक्षित रहे ।

वासुदेवले नन्दको घरमा कृष्णलाई राखेर गोकुलबाट फर्केपछि जेल स्वतः बन्द भयो र हातमा हथकडी पुनः लाग्यो । राजा कंसले आठौं सन्तानको जन्मको खबर सुनेपछि मार्ने प्रयास गरे, तर आकाशवाणीले उनलाई यस संसारमा कंसको विनाश गर्ने व्यक्तिको जन्म भइसकेको जानकारी गराएको थियो ।

राजबिराजमा आयोजित रथ यात्रा र भक्तजनहरूको सहभागिताले भगवान् श्रीकृष्णको जन्मोत्सव भव्य रूपमा मनाइएको छ ।