जनकपुरधाममा आगामी लगानी सम्मेलनबारे मुख्यमन्त्रीसहितको विशेष बैठक

जनकपुरधाम । मधेश प्रदेश सरकारले आगामी लगानी सम्मेलनको तयारीलाई तीव्र बनाएको छ । बिहीवार प्रदेश राजधानी जनकपुरधाममा मुख्यमन्त्री सतिशकुमार सिंहको उपस्थितिमा विशेष छलफल भएको छ ।

उद्योग, वाणिज्य तथा पर्यटनमन्त्री वसन्तकुमार कुशवाहा, नीति आयोगका सदस्य राजकुमार सिंह र मुख्यमन्त्रीका आर्थिक सल्लाहकार अशोक बैधलगायतको सहभागितामा भएको छलफलमा सम्मेलनका एजेन्डाबारे विस्तृत चर्चा गरिएको थियो ।

आर्थिक सल्लाहकार बैधका अनुसार सम्मेलनको मुख्य उद्देश्य धार्मिक, सांस्कृतिक, सामाजिक, आर्थिक र प्राकृतिक स्रोतहरूको परिचय गराउँदै स्वदेशी तथा विदेशी लगानीकर्तालाई आकर्षित गर्ने, सहकार्य र साझेदारीमार्फत विकासलाई अघि बढाउने र रोजगारी सिर्जना गर्ने रहेको छ। साथै, प्रदेशलाई राष्ट्रिय तथा अन्तर्राष्ट्रिय लगानी गन्तव्यको रूपमा स्थापित गर्ने योजना रहेको उनले बताए ।

सम्मेलनमार्फत कृषि, उद्योग, पर्यटन, ऊर्जा, पूर्वाधार, स्वास्थ्य र शिक्षा क्षेत्रमा लगानी अवसरहरू प्रस्तुत गरिने तयारी भएको छ । प्रदेशमा आन्तरिक तथा बाह्य लगानी भित्रिएपछि स्थानीय युवाका लागि रोजगारी सिर्जना हुने, धार्मिक–सांस्कृतिक सम्पदाको संरक्षणसँगै पर्यटन प्रवर्द्धन हुने र आर्थिक आत्मनिर्भरता मजबुत हुने अपेक्षा गरिएको छ ।

प्रदेश सरकारका अनुसार लगानी सम्मेलन मधेश प्रदेशको दीगो आर्थिक विकास, सामाजिक समृद्धि र सांस्कृतिक संरक्षणका लागि महत्वपूर्ण अवसर हुनेछ । यसका लागि प्रदेश सरकार, निजी क्षेत्र, संघीय सरकार र अन्तर्राष्ट्रिय विकास साझेदारबीच सहकार्यमा कार्यक्रमलाई सफल बनाउन तयारी भइरहेको जनाइएको छ ।