राजविराज कारागारमा महिला कैदीलाई तीज सामग्री वितरण

राजविराज । हरितालिका तीजको अवसर पारेर सप्तरीको राजविराज कारागारमा रहेका महिला कैदीबन्दीलाई विभिन्न सामग्री वितरण गरिएको छ ।

शुक्रबार सम्पन्न कार्यक्रम हरितालिका तीज मूल समारोह समिति, राजविराजको आयोजनामा तथा महिला, बालबालिका तथा सामुदायिक विकास केन्द्र (डब्लुसिसिडिसि), राजविराजको सहकार्यमा गरिएको हो ।

कार्यक्रममा महिला कैदीहरूलाई चुरा, साडी, बिन्दी, लड्डु, जलेबी, फ्रुटी र नगद सहयोग प्रदान गरिएको थियो । कारागारभित्र रहेका महिलाले पनि पर्वको उल्लास अनुभव गर्न सकून् भन्ने उद्देश्यसहित कार्यक्रम गरिएको समितिकी संयोजक तथा डब्लुसिसिडिसि की जिल्ला कोषाध्यक्ष पुनम पोखरेलले जानकारी दिइन्।

त्यस्तै, डब्लुसिसिडिसि अध्यक्ष अनिता देवकोटाले महिला कैदीहरूप्रति आत्मीयता व्यक्त गर्दै भनिन्, “यो सानो सहयोग तपाईंहरूका लागि प्रेरणा बन्न सकोस् भन्ने हाम्रो चाहना हो । आगामी दिनमा तपाईंहरूको आवश्यकतालाई अझ प्रभावकारी ढंगले सम्बोधन गर्ने प्रतिबद्धता पनि जनाउँछौं ।”

कार्यक्रममा अधिवक्ता मनु खनालले कानुनी सचेतनाबारेमा चर्चा गर्दै महिला कैदीहरूलाई पुनर्स्थापनाको बाटोतर्फ लैजाने आवश्यकता औंल्याए । उनले यस्ता कार्यक्रमहरूले मानसिक रूपमा थकित महिलामा नयाँ आशा जगाउने विश्वास व्यक्त गरे ।

सो अवसरमा मेची–महाकाली बुहारी आवाज सप्तरीकी कोषाध्यक्ष रत्ना कार्की, कार्यक्रम संयोजक मोसमी झा, सामुदायिक महिला विकास केन्द्र सप्तरीकी अध्यक्ष मिरा देव, राजविराज नगरपालिकाकी महिला शाखा प्रमुख कल्पना देव, मिलन बेकरीकी सञ्चालिका अंशु सिंह, लिटिल एन्जल्स सेकन्डरी स्कूल राजविराजका प्रधानाध्यापक कुषुम देव, कारागार प्रमुख गंगालाल योगी, मानव अधिकारकर्मी नविन यादवलगायतको उपस्थिति रहेको थियो ।