भूमि विधेयकविरुद्ध राजबिराजमा विरोध प्रदर्शन

राजबिराज । जनता समाजवादी पार्टी (जसपा), नेपाल सप्तरीले सरकारले अघि बढाएको भूमि सम्बन्धी विधेयक ‘राष्ट्रहितविपरीत’ भएको भन्दै सोमबार राजबिराजमा विरोध प्रदर्शन गरेको छ ।

विरोध र्‍याली नगरका विभिन्न स्थानको परिक्रमा गर्दै नेता चौकमा कोणसभामा परिणत भएको थियो । कोणसभामा जिल्ला अध्यक्ष केदार यादबले भने, “भूमि सम्बन्धी विधेयक मुलुक र जनताको हितमा छैन । यसले भू–माफिया र जग्गा दलालको मात्रै हित गर्नेछ । यसबाट वनजंगल विनाश हुने र तराई–मधेस क्षेत्र मरुभूमिकरणको जोखिममा पर्नेछ । जसपा नेपाल शुरूदेखि नै यस विधेयकको विपक्षमा रहेको छ ।”

यद्यपि विरोधका बाबजुद, संसदको कृषि, सहकारी तथा प्राकृतिक स्रोत समितिले २०८२ भाद्र ५ गते विवादित भूमि विधेयकको प्रक्रिया अगाडि बढाएको थियो । यसपछि जसपा नेपालको केन्द्रीय सचिवालय बैठकले निर्णय लिएको छ कि वन क्षेत्रका जग्गामा हुने अतिक्रमण रोक्न, जैविक विविधता र पर्यावरणको संरक्षण गर्न, तराई–मधेसलाई मरुभूमिकरणबाट जोगाउन तथा जल, जंगल र भूमिको रक्षा गर्न ‘भूमि र वन बचाउँ, मधेसलाई मरुभूमिकरणबाट जोगाउँ’ अभियान अन्तर्गत भूमि विधेयकविरुद्ध कडा प्रतिकार गर्ने र विरोध प्रदर्शन गर्ने ।