मुख्यमन्त्री सिंहद्वारा चौरचन र गणेश चतुर्थी अवसरमा शुभकामना

जनकपुरधाम । मधेश प्रदेशका मुख्यमन्त्री सतिश कुमार सिंहले चौरचन पर्व र गणेश चतुर्थीको अवसरमा शुभकामना दिएका छन् । उनले दुवै पर्वलाई धार्मिक र सांस्कृतिक महत्त्व जोडिएको भन्दै समाजमा एकता र आपसी सद्भाव बढाउने माध्यमको रूपमा उल्लेख गरेका छन् ।

सन्देशमार्फत सिंहले चौरचनलाई सांस्कृतिक पहिचानसँग सम्बन्धित पर्व बताउँदै यसले पारिवारिक आत्मीयता र सामाजिक सम्बन्धलाई मजबुत बनाउने धारणा राखे । त्यस्तै, उनले गणेश चतुर्थीलाई विघ्नहर्ता भगवान् गणेशप्रति आस्था प्रकट गर्ने अवसरका रूपमा चित्रण गर्दै, यस पर्वले जीवनका कठिनाइहरू सामना गर्न धैर्य र सकारात्मक ऊर्जा दिने विश्वास व्यक्त गरे ।

“दुवै पर्वले दिएको शान्ति, सद्भाव, श्रद्धा र समर्पणको सन्देशले हाम्रो समाजलाई अझ सबल, समृद्ध र उन्नत बनाउन मार्गदर्शन गर्नेछ,” सिंहको भनाइ छ ।

उनले भगवान् चन्द्रदेव र भगवान् गणेशको कृपाले सबैमा स्वास्थ्य, समृद्धि, दीर्घायु, आपसी प्रेम र प्रगतिका मार्ग प्रशस्त होस् भन्ने कामना समेत गरेका छन् ।