भूमि विधेयक मधेशविरोधी षड्यन्त्र : उपेन्द्र यादव

राजबिराज । जनता समाजवादी पार्टी (जसपा) नेपालका अध्यक्ष उपेन्द्र यादवले सरकारले मधेशलाई मरुभूमि बनाउने उद्देश्यसहित भूमि विधेयक ल्याएको आरोप लगाएका छन् ।

सप्तरीको राजबिराजमा आयोजित जसपा नेपाल नगर समिति राजबिराजको शपथग्रहण तथा पदभार ग्रहण कार्यक्रममा बोल्दै यादवले चुरे क्षेत्रको विनाशका कारण मधेशमा भूमिगत पानीको सतह घट्दै गएको अवस्थामा सरकारले ल्याएको भूमि विधेयकले थप चुरे विनाश भई मधेश मरुभूमिमा परिणत हुने निश्चित रहेको बताए ।

अध्यक्ष यादवले मुलुकको विकासको लागि सरकारले सही बाटो लिनुपर्नेमा उल्टो बाटो समातेको आरोप लगाए । विचौलिया भूमि माफियाको इशारामा आएको भूमि विधेयकले मधेशलाई मरुभूमि मात्र नभई उपनिवेशीकृत बनाउने खतरा रहेको भन्दै उनले जसपा नेपालले सुरु गरेको आन्दोलनलाई निष्कर्षमा पुर्‍याउनुपर्ने बताए ।

उनले ३५ वर्षको प्रजातान्त्रिक यात्रामा मुलुकले प्रगति गर्नुको सट्टा अधोगति भोग्नुपरेको उल्लेख गर्दै कांग्रेस र एमालेलाई दोषी ठहराए। “यस अवधिमा उद्योगधन्दा ध्वस्त भए, शिक्षाको गुणस्तर खस्कियो, मुलुक ऋणमा डुब्यो र अहिले ग्रे लिस्टमै पर्न पुग्यो,” यादवले भने ।

गरिबी, भ्रष्टाचार र वेथितिले चरम सीमा नाघेको भन्दै अध्यक्ष यादवले त्यसको अन्त्यका लागि जसपाले नयाँ आन्दोलनको शुरुवात गरेको बताए । साथै, मधेशको भावना विपरीत ल्याइएको अपूर्ण संविधानलाई पूर्णता दिन संघर्ष जारी रहेको पनि दोहोर्‍याए ।

उनले वर्तमान सरकारले संविधानकै विरुद्ध भूमि विधेयक ल्याएको दाबी गर्दै यसले मधेशमा मधेशीलाई अल्पमतमा पार्ने महेन्द्रपथको निरन्तरता दिएको आरोप लगाए।

कार्यक्रममा जसपा नेपालका महासचिव मनिष सुमनले भूमि विधेयक अघि बढाइए वा गौर घटनामा अध्यक्ष यादवलाई फसाउने षड्यन्त्र भए सशक्त आन्दोलनमा उत्रिने चेतावनी दिए ।

शपथग्रहण कार्यक्रममा नव निर्वाचित नगर समितिका अध्यक्ष अरुण यादवसहित पदाधिकारी र कार्यसमितिका सदस्यलाई जिल्ला निर्वाचन अधिकृत धनेश्वर यादवले शपथ गराए ।

कार्यक्रममा केन्द्रीय सदस्य तथा मधेश प्रदेश सभा सदस्य अनिरुद्ध प्रसाद सिंह यादव, प्रदेशसभा सदस्य किरण साह, डा. बबी यादव, राजबिराज नगरपालिका उपप्रमुख इसरत परविन, युवा नेता दिनेश यादव, जिल्ला उपसचिव रामेश्वर यादव, प्रेस मञ्चका केन्द्रीय सदस्य चन्दनकुमार यादवलगायतले शुभकामना मन्तव्य दिएका थिए। कार्यक्रम अध्यक्ष मण्डल सदस्य हेरराम यादवको अध्यक्षता र राजेश्वर रायको सञ्चालनमा सम्पन्न भएको हो ।

उक्त अवसरमा विभिन्न पार्टी परित्याग गरी दर्जनौं नेता तथा कार्यकर्ताले जसपा नेपालमा प्रवेश गरेका थिए । नवप्रवेशीहरूलाई अध्यक्ष उपेन्द्र यादवले माला र अबिर लगाई स्वागत गरेका थिए ।