राजविराजमा ठाकुरको पत्रकार सम्मेलन : “नेता–कार्यकर्तामाथिका मुद्दा तत्काल हटाइयोस्”

राजविराज । लोकतान्त्रिक समाजवादी पार्टी (लोसपा) नेपालका अध्यक्ष महन्थ ठाकुरले आफ्ना नेता तथा कार्यकर्तामाथि लगाइएका मुद्दा तत्काल खारेज गर्न माग गरेका छन् ।

सोमबार राजविराजमा आयोजित पत्रकार सम्मेलनमा अध्यक्ष ठाकुरले शान्तिपूर्ण आन्दोलन गर्ने क्रममा प्रहरी गोली प्रहार गर्ने र त्यसको प्रतिकार गर्दा समेत कार्यकर्तामाथि मुद्दा चलाइने गरेको आरोप लगाए ।

उनले प्रश्न गर्दै भने, “हजारौंलाई मार्ने माओवादीलाई मुद्दा नचल्ने, तर प्रहरीको गोलीबाट बच्न खोज्दा जन्मकैदको सजाय किन दिइन्छ ?”

अध्यक्ष ठाकुरले प्रदेश सदस्य अभिराम शर्मासहित अन्य नेतालाई लगाइएको मुद्दा फिर्ता लिन आग्रह गर्दै यसबारे हालै प्रधानमन्त्री र गृहमन्त्रीसँग भेटघाट गरी कुरा राखिएको र सकारात्मक जवाफ आएको जानकारी दिए ।

उनले लोसपाले जनताको अधिकार र स्वायत्तताका लागि मोर्चा निर्माण गरेको दोहोर्‍याउँदै रुपन्देही उपनिर्वाचनपछि संघीय र मधेश सरकारमा परिवर्तन आउने दाबी पनि गरे ।

त्यसैगरी, मधेशले धेरै राजस्व तिरिरहेका तर पनि बजेट वितरणमा अन्याय भएको भन्दै उनले कम्तीमा ३५ प्रतिशत बजेट दिने व्यवस्था गर्न माग गरे । यसैबीच, लोसपाले प्रदेश र केन्द्र सरकारविरुद्ध आफ्नो राजनीतिक आन्दोलनलाई अझ सशक्त बनाउने तयारी गरिरहेको जनाएको छ ।

पत्रकार सम्मेलनमा लाेसपा का महासचिव बिनाेद सिँह, केन्द्रीय नेता जयप्रकाश ठाकुर, अमरकान्त झा, जिल्ला अध्यक्ष सुनिल झा लगायतका नेता तथा कार्यकर्ताहरूकाे उपस्थिति रहेकाे थियाे ।