सक्कली संघीयता लागू नभएको महतोको आरोप, जसपासँग मिलेर अघि बढ्ने संकेत

राजविराज । राष्ट्रिय मुक्ति पार्टी नेपालका अध्यक्ष राजेन्द्र महतोले आफ्नो पार्टी र अशोक राई नेतृत्वको जनता समाजवादी पार्टीबीच निकट भविष्यमै एकता हुने घोषणा गरेका छन् ।

बिहीबार राजविराजमा आयोजित पत्रकार सम्मेलनमा महतोले कार्यगत एकता सुरु भइसकेको र यसलाई औपचारिक पार्टी एकतामा रुपान्तरण गर्ने प्रक्रिया अघि बढेको बताए । उनले छुट्टाछुट्टै भएर संघर्ष गर्दा कमजोर हुने भएकाले अब एकीकृत भएर सशक्त आन्दोलन गर्ने आवश्यकता औंल्याए ।

“मधेशी, आदिवासी, जनजाती, दलित लगायत सम्पूर्ण उत्पीडित वर्गको पहिचान र अधिकार स्थापित गर्न संयुक्त आन्दोलन अपरिहार्य छ,” महतोले भने ।

यस क्रममा उनले वर्तमान संघीयता ‘नक्कली’ भएको आरोप लगाउँदै वास्तविक संघीयता लागू नगरेसम्म अधिकार प्राप्त नहुने दाबी गरे ।