आठ वर्षपछि पुनः राजविराजमा गुञ्जिनेछ सप्तरी महोत्सव

राजविराज । आठ वर्षपछि राजविराजमा तेस्रो सप्तरी महोत्सव २०८२ हुने भएको छ । सप्तरी उद्योग वाणिज्य संघको आयोजनामा असोज २२ देखि कार्तिक ६ गतेसम्म महोत्सव सञ्चालन हुनेछ ।

संघका अध्यक्ष लालूप्रसाद अग्रवालका अनुसार महोत्सवमा कृषि उपज, थारु–मिथिला परिकार, घरेलु उद्योग, स्थानीय उत्पादन, पर्यटन तथा स्वास्थ्य–शिक्षासम्बन्धी प्रदर्शनी रहनेछन् । साथै राष्ट्रिय तथा अन्तर्राष्ट्रिय कलाकार, स्थानीय सांस्कृतिक समूहले दैनिक प्रस्तुति दिनेछन् ।

१५ दिने महोत्सवमा करिब १ लाख ५० हजार अवलोकनकर्ता आउने अनुमान गरिएको छ । १५० भन्दा बढी व्यावसायिक स्टलसहित झण्डै १ करोड ६८ लाख रुपैयाँको कारोबार हुने अपेक्षा गरिएको छ । स्थानीय उत्पादनका लागि निःशुल्क स्टलको व्यवस्था गरिएको आयोजकले जनाएको छ ।

महासचिव अमृत संचेतीले महोत्सवले राजदेवी, छिन्नमस्ता, कंकालिनी, शम्भुनाथ जस्ता धार्मिक–पर्यटकीय स्थलको प्रवर्द्धनमा टेवा पुग्ने विश्वास व्यक्त गरे ।

शान्ति सुरक्षाका लागि नेपाल प्रहरी, सशस्त्र प्रहरी र स्वयंसेवक परिचालन गरिनेछ । प्रवेश शुल्क १ सय रुपैयाँ तोकिएको छ ।

सप्तरी उद्योग वाणिज्य संघले यसअघि पहिलो महोत्सव २०६८ सालमा र दोस्रो महोत्सव २०७४ सालमा आयोजना गरेको थियो ।