रामकृष्ण राउतको १०औं स्मृति दिवसमा उत्कृष्ट विद्यार्थी सम्मानित

राजविराज । मधेश आन्दोलनका सहिद रामकृष्ण राउतको १०औं स्मृति दिवसको अवसरमा दुई जना विद्यार्थीलाई सम्मान गरिएको छ ।

सहिद रामकृष्ण राउत स्मृति प्रतिष्ठानले सोमबार आयोजना गरेको कार्यक्रममा कंकालनी माध्यमिक विद्यालयका २०८१ सालको एसईईमा उत्कृष्ट अंक ल्याउने नितेश कृष्ण यादव र रिचा यादवलाई सम्मान गरिएको हो । उनीहरुलाई प्रमुख अतिथि जनता समाजवादी पार्टी (जसपा) नेपालका प्रवक्ता तथा मधेश प्रदेशका सांसद मनिष कुमार सुमनले पाँच हजार एक सय रुपैयाँ नगद र सम्मानपत्र प्रदान गरेका थिए ।

विशिष्ट अतिथि पूर्व अर्थमन्त्री तथा जसपा नेपालका सचिव शैलेन्द्र प्रसाद साहले मधेश आन्दोलनको उपलब्धिका रूपमा संघीयता स्थापना भए पनि आजसम्म प्रदेश सरकार संघीय सरकारको अधीनमा रहेको धारणा राखे। उनले प्रदेश सरकारले अधिकार पाए पनि प्रहरी प्रशासन अझै संघीय सरकारकै नियन्त्रणमा रहेको बताए ।

त्यस्तै, जसपा नेपालका केन्द्रीय सदस्य शम्भु कुमार झाले भारदह आन्दोलनमा शहादत प्राप्त गरेका रामकृष्ण राउतको योगदान अपूरणीय भएको बताए । आन्दोलनमा सहिद भएका व्यक्तिलाई पछि पद र शक्ति पाएपछि बिर्सनु दुःखद भएको उनको भनाइ थियो ।

कार्यक्रम सहिद रामकृष्ण राउत स्मृति प्रतिष्ठानका उपाध्यक्ष धर्मपाल राउतको अध्यक्षतामा सम्पन्न भएको हो ।